【台文世界】紀念高仁愛

甘為霖小說獎台語組│見證獎

Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型,配合Firefox瀏覽器來讀


◎連謝靜悅

逐家攏知影老蘭醫生蘭大衛醫生娘連瑪玉 ê「切膚之愛」,hō͘一位十三歲,蹛佇庄跤ê看牛囡仔兄得著醫治,後來信耶穌,受栽培成做傳揚上帝國福音ê牧師。老蘭醫生kop醫生娘是誠媠暗夜裡ê點燈人。咱mā知影小蘭醫生蘭大弼佇臨終ê時,再三交代ài照顧喪鄉人,ài好款待in。Che hō͘我想tio̍h一層事,這層事我應該ài講:

我年輕ê時,佇彰化基督教病院服務。有一暝我上大夜班ê時,有產婦難產,當時蘭大弼院長娘、亦是彼時彰基ê婦產科主任高仁愛醫生,半暝緊緊ùi厝chông來病院急救產婦。伊無閒歸暝,最後ê結果亦是無采工,產婦猶原hō͘上帝chhōa去。

有一日,我佇一間店ê亭仔跤tú-tio̍h難產產婦ê親chiâⁿ,kā我講in想欲告病院。我問in:「恁欲告啥物?告tó一條?」我閣講:「急救hit暝,頭尾我攏佇遐,婦產科主任高仁愛醫生歸暝無閒、無睏,koh抽500cc ê鮮血注入產婦體內,一个健康ê成人一擺只有ōe-thang抽250cc ê血,高醫生為tio̍h救產婦,堅持抽加倍,就是500cc(彼時ê高醫生是sán-pi-pa),kā伊抽血ê醫生mā真毋甘(彼時iáu無血庫,干單會當對血牛買血,血牛ê品質真䆀)。到天phú-kng,高醫生ē-sái講真thiám,soah連騎跤踏車轉去ê氣力to攏無。」

我koh問in一擺:「按呢恁欲告tó一條?恁kiám無聽古早人講過:『生iâⁿ(贏)雞酒phang(芳),生輸sì-tè pang。』這句話恁無聽過mah?」In鼻仔摸teh就離開,以後就攏無koh講起。

高仁愛醫生佇彰基服務ê時,毋若盡心盡力來幫助病人,下班ê時間,mā常常佇病院ê餐廳真拍拚kā幾若位青年一對一免費教英文。Chiah-ê青年攏有受tio̍h真大ê幫助,亦有真濟人考tio̍h真好ê大學,特別是蔡茂堂考tio̍h醫學院,成做一个醫生,後來mā回應上帝呼召,做上帝ê僕人,猶原是一位傳揚上帝國福音ê牧師。這mā是一層誠媠ê暗夜裡ê點燈人ê故事。(本文為摘錄)

延伸閱讀:【甘為霖小說獎】

廣告/聖經充滿我-經文填充本

我有話要說