Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎李南衡
我ê好朋友楊正聰醫師tòa佇美國芝加哥（Chicago）已經有四十外年，最近十外年有可能是年歲khah濟ah，差不多每一年舊曆過年前，攏會chhōa先生娘轉來台中霧峰過年，3月初才koh飛轉去芝加哥。伊人真熱誠，有幾位去芝加哥大學讀博士ê台灣青年，tī留學期間攏有受tio̍h作主人ê楊醫師ê關心kah好款待。
楊醫師轉來台灣期間一定會安排一個時間kah久年ê老朋友見面，我、林俊義教授、林衡哲醫師，伊ê小妹如娃kah妹婿沈晟醫師，mā會邀請幾位早前留學芝加哥大學ê朋友，吳乃德、吳睿人、張谷銘幾位學者做夥。逐个會ē-tàng有機會鬥陣話仙，實在是真快樂ê代誌。總是有一點，阮幾个老朋友一直真歹勢ê是，轉來台灣作客ê楊醫師堅持beh作東。我幾遍攏笑講：「木蝨食客（ba̍k-sat chia̍h kheh）」。有人聽無這句台灣俗語話啥意思，我解說講：「原本chit句話是講，人客來咱兜tòa隔暝，睏ê時陣hō͘木蝨咬kah叫m̄敢，人客m̄知咱厝木蝨特別濟，掠準是木蝨愛食人客khah無仝款khah新鮮ê血，想講是咱兜ê木蝨特別愛食人客ê血，才會講『木蝨食客』。路尾煞變作講凍霜ê主人，無請人客都真無款ah，顛倒hō͘人客出錢ê，tio̍h笑講是『木蝨食客』」。
木蝨，今仔日一般台灣人攏m̄知影是啥．但是早前佇台灣應該真普遍，普遍kah ē the̍h來作俗語話。可能用華語來講khah濟人聽有，華語叫作「臭蟲」。永過，木蝨佇中國相當普遍，差不多家家戶戶攏有，木蝨ē suh人ê血，母ê木蝨ē佇寢具ê空縫生卵，一隻母ê木蝨一生ē-tàng生200至400粒卵，in生活佇室內ê眠床板、 床鋪、釘仔孔、床罩邊沿等。佇中國普遍kah有人佇報紙頂面登廣告：「根除臭蟲秘方，十元即寄。」過無兩工，koh一個廣告登講：「絕對根除臭蟲秘方，二十元即寄。」有戇戇好騙ê人寄十元去，收tio̍h根除臭蟲ê秘方干單一字「掠」，寄二十元去ê收tio̍h秘方兩字「勤掠」。
第二次世界大戰進前，日本人kā土豆（華語「花生」）叫作「南京豆」（Nanking mame），戰後才改作英語peanut直接譯音過來寫作片假名。仝款hit當時日本人kā木蝨（臭蟲）叫作「南京虫」（Nanking musi），實在是食中國人過過。聽講到今仔日猶按呢叫。M̄知有影無？
Chit兩年疫情ê關係，楊醫師翁某攏無轉來台灣作客過舊曆年。逐个朋友真正懷念kah伊做夥ê時間，m̄是阮chiah-ê「木蝨」無「客」通食才想伊。
Mài講幾年後chit句台灣俗語話會慢慢仔消失去，今仔日，你講「木蝨食客」，可能有真濟少年人會問講：木蝨是啥？
