【台文世界】Thó͘-tē, mā tio̍h kau-pôe

Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型,配合Firefox瀏覽器來讀

◎Lîm Bí-Gio̍k

Chhit-thô chi̍t ê só͘-chāi, ài ēng gōa kú ê sî-kan? He chāi lâng–ê. Kāng chi̍t ê tē-thâu, ū ê lâng chhia sái–leh to̍h kòe, ū-ê thêng-khùn khòaⁿ siông-sè. It-poaⁿ-tek, sî-kan khai lú kú, jīn-bat iā lú chhim.

Chìn-chêng ta̍k tang nā kàu 12 goe̍h, gún ang-á-bó͘ to̍h ē khì khoân-tó lú-hêng, se̍h kàu nî-bóe chiah tńg kàu chhù. Ēng chi̍t goe̍h ji̍t lâi khoân-tó ū iáⁿ thong Tâi-oân se̍h thàu-thàu, m̄ koh kám-kak tùi ta̍k tē-thâu iáu sī jīn-bat bô chhim, sī kan-taⁿ leh ùn tāu-iû niâ; chit khoán tùi ta̍k só͘-chāi phó͘-phó͘-á jīn-bat niā-niā ê lú-hêng, kám beh koh chìn-hêng tē 3 pái?

Lo̍h-bóe, siūⁿ-khí éng-kòe bat ū “thè-hiu liáu-āu beh ta̍k koān-chhī ka tòa chi̍t goe̍h ji̍t” ê siūⁿ-hoat. Chū án-ne, kū nî gún bô koh khoân tó lú-hêng ah, sī tan-tan tòa tī chhiong-móa soan-kàu kò͘-sū ê Tâi-tang, chò chi̍t goe̍h ji̍t ê Tâi-tang lâng.

Chhiâng-chāi thiaⁿ lâng kóng, Tâi-tang hó kéng-tì, m̄-koh chin bô liâu. Che eng-kai sī í hiān-tāi lâng ê seng-oa̍h hêng-thài khì chò kiat-lūn–ê. Kám kóng chi̍t ê só͘-chāi tio̍h ū pah-hòe kong-si thang se̍h, ū tiān-iáⁿ hì-īⁿ thang khì, chiah ū chhù-bī bē bô kio̍k? Góa siūⁿ m̄ sī. Kî-si̍t Tâi-tang ū pah-hòe kong-si, mā ū tiān-iáⁿ hì-īⁿ, cheng-chha bô chē niâ. Lâng nā chai-iáⁿ chi̍t ê tē-thâu ê hong-thó͘ kah le̍k-sú, eng-kai to̍h bē kan-taⁿ chù-ba̍k tī hit ê só͘-chāi ê gô͘-lo̍k siat-si i-ki̍p siau-khián soán-te̍k ah. Tâi-tang ū kui chheng kúi pah tang ê Goân-chū-bîn le̍k-sú, mā ū chū-chá lán Tiúⁿ-ló Kàu-hōe Soan-kàu-su ê kha-jiah, koh ū chiàn-āu Sun Ngá-kok bo̍k-su, Lo̍h Sian-chhun bo̍k-su kah Ô͘ Bûn-tî bo̍k-su téng chē-chē lâng ê kò͘-sū, í-ki̍p Pe̍k-léng-hōe kah Sèng-si̍p-jī-hōe ê Sîn-hū siu-sū siu-lú ê sū-chek. Ū chiah-ni̍h hong-hù ê jîn-bûn kò͘-sū thang thé-giām, thài ē bô liâu bô kio̍k leh?

Só͘-í chit pái Tâi-tang chi̍t goe̍h-ji̍t ê lú-hêng, gún ang-á-bó͘ seng khì Soan-kàu-su khì–kòe ê só͘-chāi, khai-thok ê kàu-hōe, kah Pe̍k-léng-hōe ê kàu-tn̂g se̍h chi̍t liàn, liáu-āu chiah chhit-thô chhun–ê ê tē-thâu. Nn̄g ang-á-bó͘ chhan-chhiūⁿ ku-á leh peh chhiū-á-ki án-ne, àn Tâi 9 sòaⁿ tùi Tâi-tang siōng lâm–ê Lâm-tiân chiūⁿ pak, chiap Tâi 11 sòaⁿ, kàu Tâi-tang siōng pak–ê Tiông-pin, chiah lo̍h lâm ùi Tang-hô sūn Tâi 23 sòaⁿ kàu Lāi-pêⁿ-po͘ ê Tî-siōng, koh khì kàu siōng sai-pêng ê Hiòng-iông; sòa–lo̍h-lâi hoan-thâu, koh lo̍h lâm kàu Tâi-tang chhī, chò kúi-nā kang ê chhī-bîn; jiân-āu kò-pia̍t chhī-khu kè-sio̍k lo̍h lâm, iân lō͘ se̍h tńg-khì khiā-ke. Chit chōa lú-hêng, soaⁿ kah hái, chhī-khu kah chng-kha, chng-siā kah pō͘-lo̍k, tōa thong lō͘ kah sè tiâu lō͘-á; se̍h kah chin kàu-khùi. Chāi góa khòaⁿ, Tâi-tang bē bô liâu, chiâⁿ ū kio̍k. Chóng–sī, koh lŏa-ni̍h-á hó ê só͘-chāi mā ū i ê būn-tê tī-leh. Tâi-tang kéng bí-lē, lâng siān-liông, m̄-koh ū chhò lâng hīⁿ ê poe-lêng-ki siaⁿ, koh ū that-gāi hoat-tián ê phài-hē siong-sat, tì-sú súi-súi ê soaⁿ kah hái mā hō͘ bû-hêng ê o͘ hûn cha̍h tiâu-tiâu. Tîm-tāng ê o͘ hûn tang sî ē sóa-khui? Tâi-tang ê chèng-tī tang sî ē piàn thiⁿ? Bô lâng chai. Kiám-chhái bī-lâi ē ta̍uh-ta̍uh-á kái-piàn, góa iû-goân ài phāu ǹg-bāng.

Lâng ài kau-pôe chiah ē siⁿ-chhut kám-chêng, thó͘-tē mā kāng khoán. Keng-le̍k chit pái kah Tâi-tang ê kau-pôe liáu-āu, sui-bóng iû-goân se̍k-sāi bô chhim, m̄-koh ke kiám thé-hōe-tio̍h i ê bí-lē kah ai-chhiû. Tâi-tang, thong lâng o-ló ê súi ko͘-niû-á, chiok-hok–lí.

廣告/聖經充滿我-經文填充本

我有話要說