Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◉李南衡
「福伯，你那會hiah受氣？」
福伯仔應講：「我氣in hiah-ê中國人『敢放屁，m̄敢作屁主！』（Káⁿ pàng-phùi, m̄-káⁿ choh phùi-chú！）」我問講：「中國人是按怎放屁？」福伯講：「2月24，俄羅斯侵略烏克蘭了後，有華文媒體報導講，2月24起，有中國人佇《微博》等社交媒體平台發文：『戰爭無情，人間有真情，俄烏局勢動蕩，本人出於人道主義原則，自願收領一名至兩名烏克蘭難民。要求：18至26歲，女性，相貌端正，皮膚白』chit類ê言論。」
「原本烏克蘭kah中國是相當親密友好ê兩國，mài講中國第一台航空母艦『遼寧號』是向烏克蘭買來ê半成品，中國真濟國防工業mā攏拜託烏克蘭技術人員來中國鬥相仝建立起來ê，中國是烏克蘭第一大ê貿易同伴、烏克蘭是中國第六大ê貿易同伴；烏克蘭是中國一帶一路佇歐洲ê第一站。2月初四，北京冬季奧運會開幕式，俄羅斯總統浮丁（Putin）專工拼來北京參加，hō͘中國kah習近平主席足大ê面子，習近平歡喜kah講中俄情誼無上限。致使2月24俄羅斯侵略烏克蘭ê時，中國完全徛佇俄羅斯chit旁，無講俄羅斯是『入侵』烏克蘭，不准有反戰ê言論，2月26，南京大學教授孫江、北京大學教授王立新等六位中國知名歷史學家發表一篇〈俄羅斯對烏克蘭ê入侵kah阮ê態度〉，隨時hông圍剿，佇網路頂面hông除名，罵in是『違背國家立場』。所以才有chit類烏白消遣戰火中ê烏克蘭婦女、烏白彈臭屁ê文章出現。」福伯講按呢。
我應講：「戰爭是真殘酷ê，那會使當作囝仔sńg，the̍h苦難ê烏克蘭人民來作sńg笑。佇戰爭中ê每一个家庭攏是無辜ê。事實上tio̍h是心術不正ê人才會做出chit款ê sńg笑。想講按呢tio̍h是『符合國家立場』。2月26，佇中國ê網路頂面，有佇烏克蘭ê中國留學生表示，『收留烏克蘭難民美女』chit類ê文章，已經hō͘人翻譯而且開始佇當地流傳，koh講已經有中國人佇烏克蘭首都基輔因為按呢佇路裡hông潑水。第三工，中國官員表示：『佇網路發表對烏克蘭女性難民無適當ê文章，查了發現，攏是中國境外ê人所發表ê。』」
福伯講：「Che tio̍h是我罵ê『敢放屁，m̄敢作屁主！』你敢知影，中國為tio̍h控制網路，不准外國任何網路入去中國，不准任何中國人去接觸tio̍h外國網路，設『防火長城』，mā叫作『防火牆』，用一百萬個科技人才teh管理控制。那有可能hō͘外國人入去中國網路烏白放幾十粒屁 ! Ai，chit號國家！」
若無福伯按呢講起，我mā險險bē記得有chit句台灣俗語話。
