【公報廣場】侯友宜 ê 創傷反應

(相片提供/Pixabay)

Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型,配合Firefox瀏覽器來讀

◉冊蟲

大群館事件 hō͘ 咱知影,侯友宜 ê 太太 失去疼惜 ê 能力,kan-taⁿ 會曉盡量收厝稅,一年起價5%,厝稅 ùi 一年1500萬 kā 人起價起到2000萬,hō͘ 文化大學學生 ê 家庭負擔 koh khah 沉重。In 翁仔某 hō͘ 學生 tòa 佇親像鳥籠仔 ê 所在,彼是連相閃 to 有困難 ê e̍h-chiⁿ-chiⁿ ê 房間,若是發生災難,毋就 kah in 囝 ê 代誌仝款,是經營者 ê 自私造成 ê 死傷慘重?侯友宜翁仔某這款無疼惜性命 ê 行動,bē 輸 leh 講:「彼是別人 ê 囝,無要緊。」

新北市一直是疫情上嚴重 ê 所在之一,著病 kap 死亡人數全台灣上濟,mā 無符合人口 ê 比例。咱就用本文寫作 ê 今仔日(2022年9月初6)ê 情形來講。台北市有248萬人,是人口上密集 ê 所在,9089人/km²,台北市得病 ê 有54萬人。新北市人口上濟,有398萬人,1936人/km²。若用台北市著病 ê人口比例做基準,新北市著病 ê人數佇現時無應該超過87萬人。毋過,新北市著病 ê人數是116萬,比例是台北市 ê 1.3倍。

侯友宜佇2021年6月10日講:「傍晚,站在三峽火化場火化爐前,看著沒有親人送別的新北市民,我忍著眼淚,內心無比傷痛,他們沒有家人的陪伴、沒有宗教的祝禱引領,甚至連骨灰罈,都還來不及刻上名字,我雙手合十喃喃著『兄姊啊!火來了,卡緊走,一切都過去了,希望您一路平安好走!』我很自責、傷痛,市長沒有好好保護你們。」侯友宜完全無保護市民,無 kā 長期照顧機構管理好勢、不時爆發院內感染,這是事實,毋閣,伊無反省,mā 無認為家己有必要反省。

恩恩事件 mā 仝款。新北市政府調查結果講救護車 81分鐘才來是正常、無任何失錯。伊就是按呢,無欲改進。你寄望伊?免想。除非先治療伊心內 ê 創傷,若無,伊定 tio̍h 繼續這款做法 kap 心態。事實證明,侯友宜剝削私立大學 ê 學生、罔顧行動不便 ê 老人、棄捒無助 ê 囡仔。按呢,你做基督徒 beh 投票 hō͘ 伊?
(作者為長老教會青年)

廣告/聖經充滿我-經文填充本

我有話要說