Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◉羅光喜（台南神學院舊約神學教授）
佇《台灣教會公報》3676期25版，〈Lâi thè Siōng-tè sím-phòaⁿ？〉作者問：「現代台語聖經對申命記1章17節 ê 翻譯 kap 其他版本無仝，毋知經文 ê 意思是『審判屬佇上帝』 á-sī 『人替上帝審判』？因為譯文無仝可能會引發問題。」Tī-chia，咱來討論這節經文 ê 翻譯、希伯來文經文 kap 希臘文經文 ê 意義，以及上帝佇人間執行審判 ê 方式 kap 啟示，來了解「審判怎樣屬佇上帝」。
申命記1章17節 ê 翻譯問題
申命記1章17節 ê 翻譯有三種：第一，包含1611年欽定本（KJV）、1929年 ê 美洲標準本（ASV）、1968年 ê 思高譯本、1989年 ê 新修訂標準本（NRSV）、2010年和合修訂本等，翻做「因為審判是上帝 ê（代誌）」；第二，1919年和合本、1933年巴克禮譯本、1978年新國際本（NIV）、1992年環球新譯本、2013年全民台語聖經，攏翻做「因為審判屬佇上帝」；第三，1979年、2019年 ê 現代中文版 kap 2021年現代台語版聖經翻做「因為恁是替上帝審判」。
若是翻做「因為審判是上帝 ê（代誌）」，可能有人會講：按呢就無我 ê 代誌；á-sī 咱 tio̍h 謹慎來行。若是翻做「因為審判屬佇上帝」，可能有人會講：按呢咱 mài kā 人審判，我無欲審判，你也毋通審判，咱 tio̍h 等候上帝親自審判，á-sī 看上帝 ê 審判生做啥款？
若翻譯做「因為恁是替上帝審判」，問題 koh 較濟，因為經文 ê 主體 ùi 較對重神權 ê「Siōng-tè」移徙到較對重人 ê「lín」。按呢，經文 ê「lín」是啥人？為啥物是恁替上帝審判、毋是阮替上帝審判？為啥物上帝需要人替伊審判？恁 beh 怎樣替上帝行審判？等等。這三種，佗一種譯文較對？佗一種了解較接近原意？
早期希伯來文 kap 希臘文 ê 經文意涵
今仔日 ê 希伯來文經文，大部分是根據1967年佇德國斯圖加 ê 聖經公會出版 ê 希伯來聖經（BHS）。這本聖經主要根據1929年Kittel編 ê 希伯來聖經（BHK3，1937年出版），Kittel講伊用列寧格勒抄本，是上早有全部舊約聖經 ê 希伯來聖經。1948年發現可能成文佇主前2世紀 ê 死海經卷，雖然無提供舊約 ê 全部經文，m̄-koh 內底 ê 申命記經文 kap 現有 ê 斯圖加希伯來聖經 ê 申命記經文差無濟。
咱會當用BHS作原始 ê 經文標準。申命記1章17節 ê 關鍵句是：。這句話正爿四个字是這句依從句 ê 從句（因為某種原因來順從），通常翻譯做「毋通驚畏人」；倒爿四个字是依從句 ê 依句（叫人順從所根據 ê 原因）「因為審判屬佇上帝」。倒爿半句佇信望愛聖經網 ê 逐字翻譯算是準確。總是，每一个希伯來字有它 ê 字義，翻譯經文時有真濟可能性。先看正爿四字，「a{l」是「m̄、bô-beh」；「WrWg’t」是「lín beh kià-ki, lín beh kiaⁿ, lín beh jiáu-loān」；「vyia-yEn.Pim」是「因為人 ê 面色、情面、外表」。按呢，這句話會當翻做：「恁毋通因為人 ê 面色來驚惶，毋通寄居佇人 ê 情面，毋通因為人 ê 面色來受到擾亂。」
討論倒爿四字。「yiK」翻做「in-ūi」，較無爭議；「」這个有冠詞 ê 字通譯做「審判、這 ê 審判、律例、公義、正義」；「~yih{lael」這个有介詞「el」 ê 字通譯作「屬佇上帝、上帝 ê」，若 beh 翻做「上帝 ê 代誌」（和合修訂本）有較超過，因為無「代誌」這字；「aWh」基本意義是「伊」，有時譯作「是」，信望愛網站直譯「伊家己」是有較超過。倒爿四字，通譯作「審判是屬佇上帝、這个審判是上帝 ê」á-sī「公義是上帝 ê 、上帝 ê 是公義」。按呢規句翻做：「恁毋通驚（寄居佇）人 ê 面色，因為審判是（屬佇）上帝（伊）ê。」
另一本是較早期 ê 希臘文經本七十人譯本（LXX），mā 有真濟無仝抄本。改革宗基督教接納希伯來文本，無欲用LXX做舊約 ê 根據，mā 無接納次經做聖經。根據LXX，申命記1章17節 ê 關鍵字句是「οὐ μὴ ὑποστείλῃ πρόσωπον ἀνθρώπου, ὅτι ἡ κρίσις τοῦ Θεοῦ ἐστι」，這段話通明確翻做「你毋通因為人 ê 面色 sòa 勼去，因為審判是上帝ê」。Kap 希伯來文經文無仝 ê 是集體 ê 「恁」變做個體 ê 「你」；「kiaⁿ」變做「勼去」；希伯來文「~yih{lael」（屬佇上帝、上帝 ê ）佇希臘文直接翻譯做所有格「τοῦ Θεοῦ」（上帝 ê ），希伯來文經文 ê 介詞「el」佇希臘文譯文消失，表示希臘文譯者對希伯來文「~yih{lael」 ê 了解是「上帝 ê 」，無「屬佇上帝」 ê 意思；希臘文譯者認為「aWh」ê 意思是「ἐστι」（是），無欲翻譯做「伊」á-sī「伊家己」。
咱用希伯來文經文 kap 希臘文經文 ê 基本意義，來比較近代譯本佇關鍵依從句 ê 譯文，會當知影，環球新譯本有翻譯「人 ê 臉色、情面或外貌」，其他譯本忽略。現代中文譯本、現代台語版 kā 起因句翻做「因為恁是替上帝審判」是一種意譯 ê 譯文，照文脈來講毋是完全錯誤，m̄-koh譯文脫離原文：更動原經文 ê 主詞 kap 受詞詞性，譯文增加希伯來文原文 kap 希臘文原文攏無 ê 「恁」kap「替」，依從句中 ê 依句所講 ê 主格性 ùi 事工「審判」轉移到人「恁」。雖罔按呢，申命記1章17節講 ê 審判確實牽涉上帝 kap 人這兩个角色。關鍵在佇對審判 ê 了解，到底應該 kā 審判「歸佇上帝」，á-sī 審判本來就是「上帝 ê 」？是「恁替上帝來做」，á-sī「恁 tio̍h 順趁上帝 ê 交代」來做？欲解決譯文 ê 問題，若不是揣 koh 較準確 ê 翻譯，就是需要另外解說。
上帝施行審判 ê 方式 kap 意義
就希伯來文 kap 希臘文通翻做「你毋通因為人 ê 面色著驚 sòa 勼去，因為審判是上帝 ê 」。咱探討五種狀況：1.上帝家己施行審判，人無參與；2.人施行審判，人毋知上帝 ê 吩咐，mā 無完成上帝 ê 旨意；3.人施行審判，雖罔毋知上帝 ê 吩咐，m̄-koh 有完成上帝 ê 旨意；4.人施行審判，知影上帝 ê 命令，m̄-koh 人用家己 ê 意思甚至將家己 ê 意思假做上帝 ê 命令來做；5.人施行審判，知影上帝 ê 吩咐，用「審判是上帝 ê 」這款角度來服事。
第一種，舉例來講，上帝審判亞當、夏娃、蛇、該隱、挪亞 ê 時代、所多瑪、蛾摩拉，以及上帝佇末日 ê 時施行審判等，主要攏是上帝親身執行，人無參與審判。
第二種咱無欲佇遮討論。第三種，親像哈巴谷書，上帝興起迦勒底人吞滅強暴罪孽 ê 人，迦勒底人無一定知影 in 是 teh 完成上帝 ê 工課（哈巴谷書1章2～11節）。以賽亞書講，亞述是上帝受氣 ê 槌、上帝差亞述去攻擊邪惡 ê 邦國 kap 以色列（以賽亞書10章5～11節）。人有可能 teh 施行上帝 ê 審判 ê 時家己 m̄-chai。
第四種，用列王紀下18章做例，亞述將軍對耶路撒冷人講：「Taⁿ 我上來攻擊毀滅 chit-ê 地，kiám 無耶和華 ê 意思 mah？」結局是亞述失敗轉去（19章35～36節）。亞述利用耶和華 ê 名威脅猶大投降，亞述毋是真正 hō͘ 上帝交代講 tio̍h 處罰猶大。
最後一種，來討論人施行審判，知影上帝 ê 吩咐，mā 用「審判是上帝 ê」角度來服事，上明顯 ê 例就是摩西。摩西一擺 koh 一擺叫法老 tháu-pàng 以色列人，講明上帝欲降 ê 災厄，路尾是：「因為 hit 暝我 beh 遍行埃及地，phah 死埃及地一切頭上生 ê，無論人 kap cheng-siⁿ；koh beh 審判埃及一切 ê 上帝；我就是耶和華。」（出埃及記12章12節）摩西做代誌，所行 ê 是上帝 ê 旨意 kap 作為。出埃及了後，摩西佇以色列中間審判、上帝 kā 家己 ê 神賜 hō͘ 72个長老。出埃及記18章22節關係受揀選做官長施行審判 ê 代誌，佇申命記1章9～18節 koh 講，tio̍h 照公義判斷、毋通冤枉、毋通看人 ê 外貌等，成做申命記律法 ê 一部分（16章18～20節）。
若根據申命記來討論，審判是上帝 ê ，m̄-koh 上帝 ē kā審判交代 hō͘ 受設立 ê 人去施行。關鍵 ê 原則是施行審判 ê 人 tio̍h 順趁上帝 ê 公義，用上帝頒布 ê 誡命、律例、典章來施行審判，𣍐當用家己 ê 意思取代上帝 ê 旨意。
既然審判是上帝 ê ，為什麼上帝 beh 交代人來執行？這種神人合作論（synergism）kap 上帝單行論（monergism） ê 爭論，ùi 初代教父、宗教改革、到今，就時不時出現。這牽涉福音機構 kap 教會存在 ê 必要性以及參與 ê 程度。申命記內底關係審判 ê 記事，明顯是神人合作論。總是，雖罔審判需要人 ê 參與，m̄-koh，人佇立法 kap 司法毋是主動 ê 彼爿，mā 無修訂權。立法 kap 司法是上帝 ê ，人干焦是受設立來服事伊。
× × × × ×
參考頂面 ê 討論，答案 kán-ná 是講，審判是上帝 ê ，人莫食分別好歹 ê 樹 ê 果子、毋通家己想家己 tio̍h 用 su-khia ê 標準來審判。上帝 kā 施行審判 ê 工課交 hō͘ 所設立 ê 人，施行審判 ê 人𣍐當照家己 ê 意思、會當得著啥款利益、看情面來做判斷 ê 理由，施行審判 ê 人 tio̍h 根據上帝 ê 誡命、律例 kap 典章來服事上帝，按呢，上帝 ê 公義神性會當佇「受造 ê」 ê 關係中間顯明出來。
