Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◉阿表
Nikolaus來相𤆬 ê 彼日（註1）gún翁𤆬養老院ê序大人khì齒科報到，早前m̄-bat驗出肺炎ê伊，chit斗，二測陰性，一測陽性。伊sûi連絡養老院mā寫Telegram hō͘ 我知影伊搪著ê問題hām定著ài做ê代誌。
讀完伊寫ê信息，我sûi看厝內ê食食等等kám有夠gún tòng隔離ê兩禮拜。一項一項檢查，一項一項確定，回信息hō͘ gún翁kóng：「咱ê 戰備糧草飽足」，sûi家己笑kah歪腰。笑kah歪腰m̄是好耍是料想袂到，ūi-tio̍h寒–人所做ê未行軍先攢糧tiàm chit 時chiâⁿ做九月颱無人知ê救命丹。
準備救命丹
西德tiàm 1970年hit跤兜tn̄g-tio̍h大雪一落beh 3月日無停睏，濟濟庄頭失電無食食beh成個月。Chit斗事件了，hit久ê政府開始推捒家家戶戶tiàm寒–人時備十工額ê 蠟條hām罐頭等等。起因，等待救助，家己mā ài先自助chiah有法得坐船過渡。不而過，時間一久……m̄知是風調雨順，國家萬事興，人心就袂koh攑刀驚che煩he，就m̄-bat koh聽過德國政府推捒chit个觀念。
今年熱–人濟濟專家推測今年ē是歹年冬，德國政府開始推捒chit个觀念。
Gún翁自囡仔時就綴chit个觀念行，só͘-tì gún逐年ê寒–人lóng ē款寡罐頭等等tńg–lâi囤。只是，ùi 2021年有ke koh款寡。起因，2020年台灣beh倚新正hit跤兜，佇本成tùi民眾宣講武漢肺炎只是一般流行感冒m̄免siuⁿ 驚惶掛喙罨 ê 德國政府，正式宣布肺炎m̄是親像感冒按呢hiah-nī-á簡單，chhiáⁿ民眾出入公共場所lóng ài 保持距離，鼻、喙lóng ài cha̍h 好chiah ē-tàng 出入 ê hit日開始，四常that-tó-ke（窒倒街）ê麵粉hông嫌無健康 khah mài食ê罐頭、冷凍菜蔬等等全部貯入去Hamster（Chhng-chhí，倉鼠）ê 喙䫌。我m̄知影hiah-ê受著tah-hiaⁿh（搭嚇）ê Hamster kám有kā日子過kah Leben wie Gott in Frankreich（日日正月初一，頓頓二十九暝）。不而過，我tiàm gún兜附近ê糞埽桶chia̍p chia̍p看著伊食kah規塗跤。
因為2020年 ê 影響，2021年熱–人疫苗2射注了，翁某做伙khì厝邊hiah蹓蹓踅踅，我mā險險beh chiâⁿ做 Hamster。總是，咱khah小面神m̄ káⁿ iōng讀無人ê文字就sûi 做大面神鴨母喙lo仔lo。Iáu-m̄-koh，mā是款比éng擺koh-khah腥臊tńg–lâi德國。
Só͘-pái，chit回誠誠實實搪著肺炎chit 位無人請伊來，家己自來行踏ê朋友。
Gún tī淡薄仔搭嚇猶原有法得kā四常過kah “Leben wie Gott in Frankreich” koh m̄驚今暝揣無早起頓。Gún翁kā養老院ê序大人送tńg–khì 養老院了後，養老院ê工作人員tùi伊 kóng𪜶mā koh kā養老院ê序大人hām 照護人員liū一斗，確定無一人是陽性。收著chit个消息，做牽手ê掛慮iū-koh減–寡。起因，m̄是每一个養老院ê序大人kap照護人員lóng有接受疫苗注射。畢竟「Ungeimpft ist Menschenrecht」（無注疫苗是人權）。
等待koh等待……
Tī-leh等待檢驗所報告ê時間，一直認為肺炎是鹽甕仔生蟲，是有人tī chò-bôe（做囮，誘餌) ê鬥空，伊chiah-bōe綴人hông人牽龜落湳ê德國跤球明星。肺炎chiâⁿ 做Hiō-gē（后羿) kā 伊按天頂射落–來。早前m̄願配合球團政策hông送去坐冰箱hō͘ 家己本chiâⁿ ê活水轉做死窟仔已經氣暢忍，chit-chūn koh tái著肺炎四常誠實離經，要求醫生kā伊注疫苗解決問題。醫生hō͘ 伊ê回答就親像Ikarus（伊卡洛斯） ê 故事 。
Tī chit段等待報告ê期間，我teh想是 siáⁿ-mi̍h款ê個性hō͘ chit位本底是金爍爍kah連Hiō-gē bo̍k-le̍k chiah-nī-á好ê 弓箭士lóng無法度看著伊kā伊khǎn-jió͘ ê 人，是按怎ē kā家己舞kah 「入虎喉，m̄死也烏漚」。我想百面牽磕著「月光下看人影」，妄自尊大。只是肺炎kám ē允准伊出山了後 chiah請醫生來解決m̄驚慢到，只驚不做kap水雞愖來久，跳來遠ê Khoa-hū（夸父）逐日信念kā本底是球團ê籠面抾tńg–lâi。我chit个tùi 跤球無興頭ê人mā tùi chit个賊khì chiah開門，kám掠有賊 chiok好玄 。
Tī gún逐日ná聽la-jí-o͘h ná放送跤球明星ê白虎湯藥效，mā ná靜心等檢驗所寄來ê報告。Gún翁青tiāⁿ白tiāⁿ puh一句話，無想beh秤錘拖著尾，少年就m̄-thang激骨 ài 蓋六月棉被kā家己ê好八字拆做兩个生份人。
寢頭聽無伊teh kóng siáⁿ，步頻想著 Jogi（德國前國家跤球教練），伊是四界踅來踅去chiah有法度按水鬼成格做城隍。Tī跤球界iáu-koh有偌濟水鬼想beh擢人後跤lóng 無thang擢。
Tī等待報告ê chit段期間，我笑tùi gún翁kóng「真害，咱是白鳥鼠。新聞kóng BioTech ê 頭家家己mā無注疫苗」。「M̄管佗一个年間，人類lóng是白鳥鼠。另外，hit條新聞是假–ê你應當知影。」gún 翁 ìn。
「我知–ah，就親像紅帽仔阿公是–Papa」我kā今年ê金含糖hām禮物提 hō͘ 伊。「紅帽仔阿公，一般來kóng是12月初6來行踏，看囡仔今年有守規矩無。」「不而過……」「不而過，siáⁿ？」我問。「就親像chit-má𫝛款，有時紅帽仔阿公ē無守時，晏到……」
Gún翁kā伊ê手機仔提hō͘ 我讀。我ná讀ná tùi gún翁kóng，向望少年跤球明星mā收著ê 紅帽仔阿公 ê 金含糖 kap Christkind（註2）ê 禮物。Gún翁 ê 報告是陰性三回。空襲警報，解除。
註1. 德國 ê 紅帽仔阿公12月6日來看囡仔。
註2. 12月24是Christkind來送禮。
