Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◉蔡榮信
Lâng ê sìⁿ-miā Sîn só͘-sù, goân-pún thô͘-chit piàn oa̍h-kut.
Lêng-hûn thé-chit bó-thai chhut, chhut-sì sêng-jîn chai choh-sit.
Jîn-seng hō hok sūn kî jiân, hó-miā pháiⁿ-miā mài liáu-jiân.
Seⁿ sí iú-bēng thiⁿ chù-tiāⁿ, ài-sioh kong-im sim-thâu tiāⁿ.
Jîn-seng bú-tâi ū khí-lo̍h, hó-gia̍h sàn-chhiah chai ti-chiok.
Kut-la̍t mî-nōa siōng si̍t-chāi, pîn-tōaⁿ lán-si siōng kài hāi.
Sêng-kong sit-pāi bián khòa-gāi, kam-tiⁿ khó͘-siap góa siōng chai.
Jîn-seng ì-gī ài só͘ ài, sìn só͘ sìn koh bāng só͘ bāng.
Sèⁿ-miā khang-pe̍h chiâⁿ bô-chhái, jîn-seng chhái-sek siōng kong-chhái.
Lâng kóng seⁿ iân bián seⁿ súi, seⁿ súi bô iân bô khah súi.
Sin-hūn tē-ūi siōng-ē téng, Siōng-tè bīn-chêng sī pêng-téng.
Thāi-jîn chiap-bu̍t ài si̍t-chāi, tiong hàu jîn gī ài khiā-chāi.
Chò-lâng chheng-khì bô tèng-tiám, Siōng-tè kah-ì bōe koh hiâm.
Hó-lâng chun-êng chiâⁿ kong-chhái, pháiⁿ-lâng kiàn-siàu lâng-lâng chai.
Sèⁿ-miā chhin-chhiūⁿ tn̂g lâu-chúi, chheng-liâng kam-tiⁿ sī oa̍h-chúi.
Iâ-so͘ thiàⁿ lí lí thiàⁿ I, hō͘-siong saⁿ-thiàⁿ sī chin-lí.
Hēng-hok chi lō͘ bô pat tô͘, pêng-an hí-lo̍k sī oa̍h-lō͘.
Sèⁿ-miā chi tō lân lí-kái, iōng sim koan-sióng lí tio̍h chai.
Chheng-chhun siàu-liân m̄ chai sioh, chia̍h lāu chiah chai ài pó-sioh.
Chiam-soaⁿ iûⁿ-hái koân koh khoah, gán-kong khòaⁿ hn̄g tō͘ ài khoah.
Sìⁿ-miā chi chhiū chèng khe-piⁿ, phang-hoe kóe-chí móa-móa sī.
Siōng-tè sù-hok bān-bān-nî, pêng-an hoaⁿ-hí Chhian-hí-nî.
