◎陳士彰
劉老師是我tī台語界ê一位好朋友，頭殼才調真好，生活ê撇步足濟，特別tī電腦資訊方面，功夫是一流媠。不二過，做人個性有較敏感，所以對四周圍所發生ê代誌，嘛比較會想較濟。
我前後買過3台車，逐擺車欲掛牌進前，業務員攏會問代先，看阮翁仔某對數字號碼，有啥禁忌–無？阮攏應講：「信耶穌–ê，無禁無忌！」所以新車若牽轉–來，前後車牌攏出現「4」–字。劉老師看著阮ê新車牌，攏講阮是食好膽藥仔。
劉老師有時陣會kap我鬥陣去做田野調查，有一暗去歇tī一間飯店，櫃臺小姐交一支鎖匙hō͘ 阮。當入去電梯內底，我kā劉老師講：「咱下昏tòa 4樓413房。」
伊應我：「你目睭chhuh-chhuh，明明寫5樓515房！」
「無採你頭殼遐呢好！你斟酌看覓，電梯內底豈有寫4樓，所以咱tòa 5樓，其實就是4樓！515就是413房！M若有4，koh有13，號碼帶雙衰，我看房間我一個人tòa，你下昏去睏車頂。」我掠著機會，bóng kā詼（khoe）一下。
前一站我ê二兄心臟開刀，三不五時我會敲電話去請安，二兄tī電話彼爿攏會滾耍笑：「猶勇健健咧啦！若死去，我會代先敲電話報你知。」
劉老師tī邊–á，聽阮兄弟仔兩人講電話，甚物「死」啦、「活」啦，感覺足ngāi-gio̍h，攏會用手輕輕仔pa我ê頭殼。電話講soah，我斡轉身kā伊講：「無禁無忌，食百二！」
年外前，有人引chhōa一位姊妹來信主，教會將伊分來我ê小組。領洗禮進前，牧師安排伊去台仔頂做見證。有一段伊按呢講：
「我原底足迷信，逐項代誌攏要問神拜佛，名去改兩擺，身分證號碼去換一擺，迎神明、安方位、初一、十五食菜等等，無所不至，舞kah家己帶憂鬱症，強強欲起痟，幾偌擺自殺無成。當我來教會，參加小組了後，我看所有ê兄姊，m̄ 若m̄ 驚死，反倒轉活了足快樂–ê，我才知影，信耶穌原來遐呢有平安、喜樂！」
是啦！人踮tī世間，袂免得會tú著艱難困苦，這kap民間ê禁忌，並無有甚物關係。人為著解決問題，四界盲目搜揣解決ê方法，只是干單加添家己心理ê不安。唯一正確ê一條路，就是斡倒轉相信基督ê福音，所以耶穌講：「……是欲予恁tī我內面有平安。Tī世間恁有苦難，m̄ 閣著勇敢，我已經較贏世間。」（約翰福音16章33～34節，台語新譯本，下同）
20外年前，想欲買一間屬家己ê厝，阮翁仔某m̄ 若四界看厝，也計算家己ê經濟能力。後來揣著一間新公寓ê 4樓，價數比附近ê厝每坪攏較俗1萬，濟濟人kā阮嫌，講4樓m̄ 好，以後若想欲賣，嘛足歹脫手。
十外年前，因為丈人、丈姆年歲濟，婦仁人想欲tī附近買厝，照顧較利便，所以的確要賣舊厝來換新厝。無拍算，原底附近厝價夯懸（giâ-koân），阮厝邊成久攏賣袂出去，不二過因為阮翁某kā價數壓比別人較低淡薄，足緊就完成買賣舊厝換新厝。所以，那有影「4」是bái數字？！
保羅講過一句話：「著謹慎，m̄ 通hō͘ 人用空洞虛假ê哲學kā恁迷去，因為遐ê學說是根據人ê傳說kap支配宇宙ê邪神，m̄ 是基督。」（歌羅西2章8節）
其實，屬tī基督ê人，攏無需要為著人生煩惱驚惶，因為詩人按呢講：「人ê心計畫伊ê路，獨獨耶和華定著伊ê跤步。」（箴言16章9節）
