◎李南衡
1964年，我東海大學畢業去做兵，因為是大專畢業生受短期專業訓練了就官拜少尉行政官，派到上低單位ê連部。無諾久tio̍h發現充員兵佇尻川後攏稱呼一位士官周班長「苦瓜」，我真好奇，細聲問in啥緣故？In解說講，因為頂一批退伍ê充員兵有交待講in叫伊「貓面ê」，無注意hō͘伊聽tio̍h、hō͘伊掠去拍kah叫m̄ 敢，周班長是外省人，hông叫「貓面ê」叫一下久，mā聽有啥意思，當然會真受氣。我kā in講：恁mā khah好心咧，伊出世佇無注重公共衛生ê中國大陸，細漢無種痘（chèng-chu）、tio̍h天花（thian-hoa）死無去才會變作「貓面ê」。咱真幸運出世佇台灣，細漢囝仔ê時攏曾「種痘」，護士佇咱ê手胳頭拍一個抑是兩個「X」，過幾工會腫kah紅tiū-tiū koh會足chiūⁿ，按呢叫作「出痘」（chhut-chu）。老師父母教示咱m̄ -thang去jiàu才bē發癀。任何人若出過痘，伊一生攏bē tio̍h天花。痘種了若無出痘ê，父母會教伊食蝦仔抑是土豆，趕伊緊出痘。「貓面」敢是周班長伊家己愛ê？拜託恁以後m̄ -thang按呢凌遲人。
天花是一種足強烈ê傳染病，死亡率30葩，因為kah病人直接接觸，抑是透過病人ê嘴涎、血、皮膚屑仔、排泄物，甚至摸病人摸過受tio̍h污染ê物件mā會傳染tio̍h。潛伏期差不多13工，了後開始發燒、頭疼、腹肚疼、吐，皮膚開始生一粒一粒那像痱仔、會起水皰puh膿，兩三工後歸身軀攏是，續落去堅庀了會落庀。病症輕ê歸身軀攏會留落來「貓點」，重ê無救、一命嗚呼。16至18世紀，每年因為天花死去ê人數歐洲有50萬人、亞洲有80萬人，歐洲tī 18世紀天花死去ê人數大約有1億5000萬人。自了m̄ -bat有根治ê藥仔。
好佳哉，1798年英國醫生曾拿（Edward A. Jenner, 1749～1823）發明kā人種痘（也就是種天花疫苗）來預防天花，經過兩百年來人類堅持種痘無煞。1955年台灣正式宣布台灣根除天花，1979年起停止種痘；1980年，世界衛生組織（WHO）宣布全世界停止種痘，到今仔日，全世界攏無koh再發現任何天花病例。
你有時看一個人phú-phú，致使會有輕視抑是無敬重伊ê話語表現出來，真正知影hit-ê人有真才實力ê人，有可能會細聲kā你講：「你mài看人貓ê無點（lí mài khòaⁿ lâng niau-ê bô tiám.）」「貓ê」就是指貓面ê，伊歸面攏mā是點，你那會目睭sa無金，看人「貓ê」ê無點？表示你看人無正確、看人siuⁿ無。
台灣已經50外年無「種痘」ah，至少一甲子以上無人因為作囝仔ê時無種痘致到「貓面ê」。過幾年，你若有機會勸少年人講：「你mài看人貓ê無點。」伊真有可能會問講：「是m̄ 是我tio̍h看人貓鼠仔有點？」
