【台文世界】做父母 ê 無奈

Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型,配合Firefox瀏覽器來讀

◉陳柏壽

我毋知其他五位兄弟姊妹過去有pōe-ge̍k(悖逆)父母啥物。至少我細漢ê時,to̍h不時悖逆父母á-sī無聽話。Chit-má我做人老爸,才知影過去按怎無順服父母ê代誌。英文有一句話講:「囡仔無順趁父母是in做囝必然ê天職。」(To disobey the parents is what the children are born for.)真正有影。

聖經內有真濟所在攏記載父母是囡仔一世人ê倚靠:「恁想看父疼咱到怎樣,hō͘咱稱做上帝ê囝。」(約翰一書3章1節);「婦人人豈會bōe記得伊食奶ê嬰仔,無憐憫伊所生ê囝?In kiám-chhái有bōe記得ê,總是我無bōe記得你。」(以賽亞49章15節);「閣親像鷹鳥lā伊ê巢,tī鷹á ê頂面ia̍t伊ê翼,thí開翼股來sîn伊,載伊tī伊ê翼股。只有耶和華chhōa伊,無別ê上帝kap伊tī-teh。」(申命記32章11~12節);「我偌多遍愛欲聚集你ê囝兒,親像雞母聚集雞仔囝kā in攔佇翼股下,恁攏無愛。」(路加福音13章34節);「Taⁿ我beh喉叫,親像beh生ê婦人人;我beh hā-hā喘bōe接氣。」(以賽亞42章14節);「佇我ê父ê家有多多厝宅;若無,chiū我已經kā恁講啦。因為我去,是kā恁備辦所在。」(約翰福音14章2節)

做父母,尤其是老母,人生最大ê關卡就是生囝。Seⁿ iâⁿ ke-chiú phang, seⁿ su sì-phìⁿ pang。生囝ê時是老母人生最極端ê感情kah意志ê總合,肉體極端ê疼痛,加上欲將新性命生出來ê最高ê意志,攏集中佇這个瞬間。這是人類欲延續性命必需經過ê關卡。經過生產ê關卡,咱才知影性命ê風險kah祝福,性命ê韌性kah脆弱,也是做人父母最大ê無奈。

囡仔ê出世毋是做父母任務ê完成,反轉是所有艱難ê開始:一世人kah囝做伙拖磨,對老母kā紅嬰仔飼奶開始,老爸佇外口趁錢飼家,一直希望囡仔緊大漢,大漢以後閣希望伊ē-tàng自立成功趁錢成家立業,閣驚伊飛siuⁿ遠,真正時時刻刻,「捏驚死、放驚飛」,風吹線giú ân-ân,閣毋甘放。

一直到囡仔大漢,希望伊ē-tàng照你ê意思kiâⁿ你ê路,chhoàn-chhoàn伊欲kiâⁿ ê伊家己ê路,你to̍h sī佇邊仔hoah,mā無路用,你愈hoah,伊kiâⁿ愈遠。你希望伊kiâⁿ正爿,伊chhoàn-chhoàn欲kiâⁿ倒爿。咱人人差不多攏有這个經驗,這是咱ê父母人生ê無奈。

上帝陪咱做伙經過咱ê人生,mā是kāng-khoán。Pún-chiâⁿ咱lia̍h-chún-kóng咱ê上帝是永遠、全能、不變ê上帝,kah咱古早teh想咱ê父母kâng-khoán,chit-má才知影上帝欲陪咱過一世人,mā kap咱chit-má做人ê父母kâng-khoán,時時tú-tio̍h困難、絕路、失望、反叛、抵抗。

咱佇世間chiâⁿ-chòe一个脆弱ê父母,上帝mā時時變做一个脆弱ê天頂ê父母,上帝mā有kóng bōe出ê無奈。上帝對咱ê疼痛就是按呢。上帝欲疼惜, 伊欲mo̍͘h咱ê時,咱toh閃邊,上帝叫咱來身邊ê時,咱走愈遠。可能就是上帝用按呢來訓練咱,hō͘咱放膽勇敢向前kiâⁿ,因為上帝知影,有一工咱一定會轉來厝。咱有一个脆弱ê上帝,kah咱有脆弱ê父母共款,有無奈ê存在,這才是咱真正ê上帝。

廣告/聖經充滿我-經文填充本

我有話要說