◎陳金順
「Action!」
王清美坐tī導演椅頂面,中氣十足喝出這聲。
薛明俊聽著這聲Action,照拄才副導演講ê要點,展開該當有ê動作。
「卡!重來一擺。」
「歹勢!歹勢!」
這个鏡頭因由薛明俊ê緣故,攏總NG五、六擺才OK。
伊一个面袂輸紅關公,直直向在場ê演員佮工作團隊頕(tàm)頭會失禮。
過晝歇睏,伊便當領咧,孤一人行去外景地ê菜瓜棚,尻川拌(pōaⁿ)拌咧,坐tī棚仔跤食飯。
陣陣涼風吹來。
*
「5場1 Take 1!」
生作細粒籽ê王清美,拍板ê聲說不止仔大聲。
薛明俊ê三魂七魄袂輸夆(hông)吸去,導演已經喝Action,伊ê目睭猶盯咧王清美身軀頂,該當有ê動作攏無做。
「卡!重來一擺。」
「歹勢!歹勢!」
這个鏡頭因由薛明俊ê緣故,攏總NG五、六擺猶袂OK。
「你共(kā)我閃較遠咧。」導演唯導演椅頂面徛起來大聲罵。
伊一个面袂輸紅關公,直直向在場ê演員佮工作團隊頕頭會失禮。
王清美掠薛明俊看一下,露出無奈ê表情。
彼日中晝,伊連便當都無領,孤一人離開拍片現場。
路裡日頭赤炎炎。
*
「開工!」
聽著副導演聲喉放盡磅,薛明俊目睭揉(jôe)揉咧,自18冬前ê夢境逃脫。
因為落大雨,彼下晡兩點外鐘就收工。
薛明俊行到經紀人身軀邊,tī「臨時演員酬勞表」頂面簽名,經紀人紲(sòa)手共一張五百箍銀票交予伊。
錢領了,薛明俊無意仔無意行向客運車牌仔。早起好天,伊無chah雨傘,只好放乎雨湳。
「上車!」
一台紅色喜美仔停咧薛明俊面頭前。
伊看入半開ê車窗,坐踮駕駛座頂面ê是導演王清美。
薛明俊頓蹬(tùn-teⁿ)兩秒鐘才軁(nǹg)入車裡。
*
「喂!你哪會一个人踞踮壁角邊食飯?」第二擺tī拍片現場,中晝歇睏,王清美行來揣薛明俊講話。
「我較無愛參人相交插。」薛明俊掠伊看一下,無意仔無意應話。
「我敢會當坐落來作陣食飯?」
薛明俊連紲頕兩下頭。
「來,這予你。」坐落了後,王清美共滷雞腿挾予薛明俊。
薛明俊目睭展大蕊,掠王清美看一下,共一簇高麗菜挾過伊ê便當匣仔。
「你遮呢閉思哪會想欲來搬戲?」
「我……」薛明俊雞腿拄好塞咧嘴裡。
「頂回你哪會掠人金金看,煞袂記得走位?」
聽著王清美提起彼件見笑代,薛明俊一个嘴開hāⁿ-hāⁿ,規个面袂輸紅關公。
*
雨裡,王清美共薛明俊載去一間有落地窗ê咖啡館。
「Waiter,予我兩杯卡布奇諾。」服務生抵(tu)過來ê Menu,王清美連掀都無掀。
「妳猶是佮以早相像,遐呢阿沙利。」薛明俊看入王清美ê嚨喉蒂仔。
「欲來一枝無?」王清美唯橐(lak)袋仔撏(jîm)一包PEACE出來,那點薰那問薛明俊。
薛明俊幌頭。
「你嘛是佮較早仝款,薰酒攏無沐(bak)。」
薛明俊頕頭。
「18冬前,你哪會雄雄失踪?」王清美啉一嘴卡布奇諾了抐(lā)起話頭。
「講來話頭長,」薛明俊掠王清美看一下,勻勻仔啜(chip)一嘴卡布奇諾,紲咧講:「攏是為著地下電台。」
「地下電台?」
*
彼日,收工了後。
薛明俊騎兜風50欲轉去稅厝徛,油才拄摧咧,王清美就唯後面傱偎來,「我機車牽去修理,你敢會當載我轉去?」袂曾等薛明俊應答,王清美就直接跳起後座。
機車細台,王清美佮薛明俊坐誠偎,伊雙手真自然攬薛明俊ê腰,一絲仔都袂感覺礙謔(gāi-gio̍h)。
薛明俊汗珠直直濆(bùn)出來。
自南港騎到松山,tī離王清美in兜較歛(liám)兩百公尺ê十字路口,一台野狼仔125趕欲超車,青碰白碰唯後斗撞過來。
王清美、薛明俊雙雙摔落車跤。
薛明俊好運淡薄仔擦傷,王清美毋那額頭受傷,尚且,正手去扭(láu)著。
「今欲按怎,明仔載猶有班呢?」王清美雄雄呶(nauh)這句。
「我有辦法。」薛明俊講。
*
「你哪會遮呢憨!佮人舞啥物地下電台。」王清美聽薛明俊共失踪ê原因講煞,目眶略仔紅紅。
「實在想袂到,會當tī下港閣見著妳。」薛明俊共王清美搭兩下肩胛頭。
「我嘛想袂到,你佮以早仝款攏無啥變。」
「我18冬前做臨時演員,人生踅一輾迵(liàn-thàng),18冬後嘛是做臨時演員。妳有影無簡單,唯場記做到導演,有妳這个朋友,確實誠光榮。」
「臨時演員講起來比tī 7-11做散工較歹討趁,你這幾冬來毋活kah足辛苦?」
「日子總是會得過,菜脯根罔咬鹹。」薛明俊這句話應kah輕魍(báng)魍。
「這齣電影量約閣半月日殺青。」王清美啖一嘴卡布奇諾接咧講:「紲落來,我手頭有一支MV,我感覺你ê氣質佮歌詞ê意境誠合,敢願意來搬男主角?」
「主角?」聽著這个全然毋敢數想ê名詞,薛明俊含咧嘴裡ê咖啡差一屑仔溢出來。
*
「12場1 Take 1!」
車厄隔轉日,薛明俊借一台光陽90仔,透早唯板橋騎去松山載王清美。
王清美手扭著,經過導演同意,暫且予薛明俊代替伊擔當場記。
雖然,薛明俊拍板無啥在穩,毋過,有王清美tī邊仔指導,攏無半點仔脫箠(thut-chhê)。
黃昏時仔收工。薛明俊載王清美去饒河夜市,兩个人有講有笑,薛明俊體諒王清美手無利便,捷捷飼伊食物件,王清美面裡ê笑容規暝毋bat停過。
便若搪(tn̄g)著拍片,薛明俊相像唯板橋騎車來松山載王清美。
一直到kah 3禮拜後,王清美正手全然復原。
相隔工,王清美想欲提一寡所費予薛明俊,成作這段時間相替手ê謝金。
薛明俊無講無譫(tàⁿ),自彼日起,伊消失tī茫茫人海。
*
薛明俊穿插飄撇,看起來少年成十歲。
伊感覺規个人輕魍魍,親像咧眠夢。
王清美tī目睭前出現,伊ê心才較定著。
「這是我寫ê小說,用妳做主角。」薛明俊提一疊A4 ê紙予王清美。
「你嘛是主角。」王清美笑笑仔回應。
5分鐘後。
「Action!」
王清美坐tī導演椅頂面,中氣十足喝出這聲。