(請安裝Taigi Unicode字形，配合Firefox瀏覽器來讀)
作者◎李南衡
今年過年前，阮大直教會賴長老娘拚厝內拭櫥仔，無細膩khê tio̍h電線，音響ê擴音箱（su-pì-kà）煞落落來（lak-lo̍h-lâi）hám tio̍h腳盤，去病院檢查，好佳哉骨頭無碎裂抑是變形，干單腳盤腫起來koh烏青。我安慰伊講：「老骨碇khong-khong，老皮bē過風。（lāu kut tēng-khong-khong, lāu phôe bē kòe hong.）」賴長老娘應講：「無ò͘！是我腳盤厚，若無，老骨可能一聲tio̍h hám碎去ah，老骨那有影碇khong-khong？老骨極phàⁿ無比，m̄ 才講老人m̄ -thang跋倒！」
聽起來mā誠有理。因為人ê骨頭質量tī 30至40歲ê時達到最高峰，續落去tio̍h漸漸落崎。查某人更年期以後、一般查甫查某上50歲以後，tio̍h會有比較khah明顯ê「原發性骨質疏鬆症」發生，也就是骨質慢慢仔流失去，一年平均流失0.5～2%，也就是講人愈老骨質愈疏鬆，老骨無影「碇khong-khong」，人愈老「骨折」ê機會顚倒愈大。
一個人做工過頭勞苦，咱講是：「做kah曲痀（khiau-ku）去」，正是人老骨質疏鬆症ê現象，另外一種現象koh khah濟人有親身體驗ê就是「食老倒kiu」。我24歲作兵ê時身高165公分，今年74歲頂日體檢是164公分，醫生講50年才kiu1公分niā-niā猶算bē-bái，有人倒kiu koh khah濟！醫生講，除了定定食魚脯仔、海菜、黑麻仔等鈣質khah懸ê食物以外，一工行路行一點鐘，加減曝日頭增加Bi-tá-bín D，對減緩骨質疏鬆症mā有幫贊。
真濟人想講人食老皮膚才開始老化。其實若照醫生講，人ê皮膚ùi出世tio̍h開始老化，也就是講新ê皮膚直直生出來，舊ê皮膚直直老化褪掉。皮膚組織一直成長、愈來愈厚到25歲前後是最高峰，續落去老化比生長愈來愈緊，皮膚ê彈力纖維漸漸變粗，40至50歲，皮膚老化了上明顯，也就是皮膚愈來愈薄，表皮細胞核分裂增加，烏色素mā愈來愈濟，老化細胞tiâu佇表皮角質層，致使皮膚表面愈來愈碇、皮下脂肪愈來愈減少，皮膚表面失去油質光影。
續落去皮膚繃（piⁿ）bē ân，皺紋tio̍h愈來愈明顯，有人面ê皺紋濟koh深，所以才會滾笑講：「伊面ê皺紋會tàng夾蝴蠅。」人年歲愈大對冷熱mā愈來愈無敏感，致使hō͘人誤會講是「老皮bē過風。」事實應該顚倒講：「老皮上驚風」才tio̍h。
醫療衛生智識ê進步發展，一般人對老人健康有koh khah正確ê瞭解了後，知影骨質疏鬆症ê嚴重性，mā知影人ê皮膚老化ê真相。相信此後會愈來愈少人講「老骨碇khong-khong，老皮bē過風。」chit句台灣俗語話，將來若有人親像我按呢講，真有可能會hông笑講是無常識ê人。
李南衡《那teh褪色的台灣俗語話》（1-2冊 )已經出版，歡迎交關，做伙進步
