Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◉So͘ Iàn Tek
Lám tiâu kiōng-beh lo̍h-hái ê ji̍t-thâu
Giâ khí kiōng-beh hō͘ o͘-hûn jia-khàm ê goe̍h-niû
Siú-hō͘ kiōng-beh sit-lo̍h kng-bêng
Chhian-chhian bān-bān ê thiⁿ-chheⁿ
Sîn-tio̍h kiōng-beh tūi-lo̍h ê sàu-chiú-chheⁿ
Ji̍t-thâu nā lo̍h-hái o͘-àm tio̍h kàng-lîm
Goe̍h-kng nā hō͘ o͘-hûn jia-khàm tio̍h ē àm-tām
Hong-hō͘ nā lâi chheⁿ-sîn tio̍h sit-khì kong-bông
Góa beh lám tiâu kng-bêng
Góa bô-ài bū-bū bô-bêng ê o͘-iā
1947 kòng-bīn-tháng ê chhá-nāu siaⁿ
Hō͘ Tâi-oân piàn-chiâⁿ pháiⁿ-tâng kū-siah
1947 chhò-lâng-hīⁿ ê kńg-chi̍h-siaⁿ
Koah-tn̄g Tâi-oân-lâng ê chhùi-chi̍h
Chhōe bô chó͘-sian bó-gí ê iáⁿ-chiah
1947 khióng-pò͘ ê chhèng-siaⁿ
Hō͘ Tâi-oân-lâng sit-khì án-tia
1947 pin-pin-piàng-piàng ê hán-hoah siaⁿ
Tâi-oân-lâng hoan-gêng chó͘-kok ji̍p tōa-thiaⁿ
Siáng chai,
In tah-pòa chhù-hiā phò-hoāi lán ê chng-siā
