Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◉李南衡
福伯氣phut-phut罵講：「有影是『賊khah惡人！（chha̍t khah ok lâng!）』」我問講是啥代誌？福伯應講：「我是罵統一促進黨總裁『白狼』張安樂。」我問講：「你chiah好膽敢罵竹聯幫老大、統促黨總裁『白狼』張安樂是賊仔。伊偷the̍h啥物？」
福伯煞笑出來講：「早前佇台灣有賊仔hông掠tio̍h，m̄-nā無認錯，顛倒歪理歸山坪，聲頭並大聲。日後見若有做m̄-tio̍h ê加害者，聲頭壓過受害者，比受害者khah歹khah大聲，咱tio̍h會講『賊khah惡人！』chit句台灣俗語話。」
福伯講：「台中市大甲鎮瀾宮逐年攏會舉辦九工八暝ê大甲媽出巡遶境活動，終點是嘉義縣新港鄉奉天宮。4月初八暗時11點出發，4月初九暗時來到彰化，統促黨總裁『白狼』張安樂來講beh接轎，爆發幾仔波推捒衝突。現場棍仔、管仔、罐仔、番薑仔水四界飛，警方佇現場掠6名不法份子依妨害公務罪偵辦。第二工，彰化縣警局長吳坤旭指出，初九暗時，統促黨出現tio̍h beh強勢搶轎。副分局長鐘振邦有去向對方強調，in無列佇接轎名冊內底，in mā無出示鎮瀾宮所發ê有編號ê「疫苗3 OK卡」，所以才無hō͘ in接轎。無疑誤，白狼張安樂ê客查某子李家葳忽然間大聲喝：『全部ê人攏過來！』一大陣人自按呢衝倚來，致使鐘振邦副分局長hông推捒koh拍tio̍h傷，猶原忍痛壓制暴力。李家葳kah伊ê翁婿吳金虎涉嫌喝衝，引起推捒衝突，甚至引爆近年來上大規模ê暴力衝突，造成副分局長等3名警察受傷，檢警拘提李女翁某到案。」
福伯koh講：「彰化地檢署以涉嫌煽惑或教唆他人犯罪等罪嫌傳喚張安樂，4月12下晡tio̍h向地檢署報到。張安樂到位了後，m̄-nā無認為伊有率眾鬧事，顛倒忿忿不平講：『組織犯罪ê是彰化警察分局長王國峯，警方若mài利用公權力組織犯罪，伊ê部下哪會有暴力發生咧？』」
福伯講：「白狼張安樂指控警方是『組織犯罪』。有影是咱台灣俗話所講ê：『賊khah惡人！』」
我驚一下，緊問福伯：「你m̄驚白狼張安樂告你公然侮辱？」
福伯笑：「幾冬前，高雄一位洪里長陪同里民張小姐出席勞資糾紛調解會，認為資方要求張小姐簽一張『未滿1年離職tio̍h賠8萬』ê切結書無理，而且當時代表公司ê施先生惡刺刺、態度誠bái，洪里長罵一句『賊khah惡人』，煞hông告，依公然侮辱起訴。高雄地方法院有函請國立成功大學台灣文學系鑑定，認為台語俗語話『賊khah惡人』，歸句話是比喻加害者比受害者koh khah歹ê意思，並m̄是罵對方是『賊仔』。法官認為洪男無侮辱施男ê犯意，判伊無罪。」
我講，好佳哉判伊無罪，若無，以後chit句台灣俗語話煞無人敢講。
