Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◉歐玉薇
台南神學院每年ê歇熱，攏會派研究所二年級ê學生去基督教機構實習，開闊學生ê心胸kap宣教觀。今年我有機會到伊甸基金會實習，參與基金會大林雙福園區開設ê課程，kap行動無方便ê長輩做伙上課；另外koh認捌基金會內底每一个單位，參與基金會內部kap外部ê活動。
每一个單位攏hō͘我知影，佇咱teh幫贊身體無方便ê人ê時，咱必須按照in ê需要來hō͘ in正確ê協助。基金會mā hō͘ 我有機會到庄跤所在服務社區ê長輩， hō͘我實際了解ē-tàng幫贊長輩出門ê家私是真重要ê物件。佇我去新營做志工體驗ê時，我親身kap行動無方便ê學員做伙體驗眼睛看袂著ê無方便，了解無窒礙設備ê重要。
佇kap行動無方便ê長輩學員鬥陣學習ê這段時間，確實hō͘我感受著阮中間ê距離ná來ná近。學習ê過程hō͘阮koh khah近倚上帝ê疼，也hō͘我感受著性命ê意義。我看著疼kap接納：疼是疼人ê心；接納就是接納人ê 無完全，mā包括自己ê無完全。尤其，是我本身mā佇身體無方便ê家庭來大漢，ē-tàng體會啥物是疼、啥物是拒絕、啥物是kā人看輕。
我teh想，心內有疼就是hō͘人活teh有尊嚴。每一个身體殘障ê人攏值得hō͘人尊重。佇基金會ê學習，我感受著上帝ê疼一步一步近倚咱所有ê人，尤其是佇 「受著照顧」ê這陣人身上，基金會同工對in付出ê疼，hō͘我真感動，mā hō͘我有真濟ê反省。M̄-nā佇需要ê人身上，佇單位內底同工互相幫贊，mā是一款ê疼，就親像佇教會內底ê同工也需要互相幫贊kap鼓勵，我感覺這是真重要ê代誌。
佇伊甸基金會ê實習雖然只有短短二個月，hō͘我體會著福音m̄-nā是佇教會內底，koh khah是佇社會中間。疼心是濟濟受著基金會幫助ê人感受ē tio̍h ê， 咱毋是徛佇遠遠ê所在teh看，咱tio̍h kiâⁿ到需要ê人中間，用行動來疼遮ê身體無方便ê人，這就是離in上近ê疼，這就是基督ê福音。
（作者為台南神學院學生）
