【那teh褪色ê台灣俗語話】做賊的喝掠賊

Chò-chha̍t--ê hoah lia̍h chha̍t

Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型,配合Firefox瀏覽器來讀

◉李南衡

福伯講:「最近有人『做賊的喝掠賊(Chò-chha̍t–ê hoah lia̍h chha̍t)。』」我問:「啥人chiah可惡?」福伯應:「俄羅。」「俄羅到底kâng偷the̍h啥物?」我問。福伯慢慢仔分析講:「早前咱台灣庄腳若半暝有人喝掠賊,khah濟是賊仔來偷牽牛,歸庄ê壯丁攏夯棍夯槌chông出來喝掠賊。佇tui-jip賊ê中間,一位長輩目睭誠利,發現走佇上頭前喝掠賊喝上大聲hit ê人m̄是咱庄裡ê人,緊叫幾個少年人趕緊去掠hit ê人。掠來村長ê厝,才敲電話請警察來處理。Che tio̍h是『做賊ê喝掠賊』。以後無抵抵是做賊,見若有做m̄-tio̍h代誌抑是做啥歹代詓,為beh推卸責任,先出聲指責別人,人mā會講伊是『做賊ê喝掠賊』」。

「俄羅是按怎做賊ê喝掠賊leh?」我koh問。福伯講:「5月13,俄羅外交部長拉夫羅夫(Lavrov)去中亞ê塔吉克(Tajikistan)參加獨立國家國協(CIS),會議了後伊開砲指控歐盟有『侵略性』koh「好戰」。原本二月24俄羅入侵烏克蘭ê理由是烏克蘭想beh加入北大西洋公約組織(NATO),但是戰爭以後,烏克蘭一直強調in無可能成作北約ê成員,強調in大力推動申請加入歐盟。俄羅外交部長ná-ē烏白罵歐盟?」

我ìn:「咱知歐洲聯盟簡稱「歐盟」(EU),是歐洲多國共同建立ê政治kah經濟聯盟,有27个成員國。北約是歐洲kah北美洲國家為tio̍h實際防衛合作來建立ê國際組織,有大量核武器kah常設部隊,是西方ê重要軍事力量,有30个成員國。」

福伯講:「2月24,俄羅出兵侵略烏克蘭,pàng-tiau(放刁)96點鐘、也就是四工內完全占領烏克蘭,派兵派戰車派戰機派戰船侵占、破壞隔壁國ê領土、領空kah領海。戰爭抵開始ê時,北約無一个國家伸手支援,看烏克蘭孤軍奮戰、俄羅大軍入侵、欺人太甚,北約才一个一个運送上新上好ê武器支援烏克蘭,hō͘烏克蘭lú拍lú勇。到今仔日為止,北約猶無派一兵一卒去贊烏克蘭,是烏克蘭全體軍民展示愛國衛國ê英勇表現。」福伯講。

福伯繼續講:「到5月23為止,俄羅軍已經陣亡約2萬9,200外人,烏克蘭軍毀滅俄羅軍1,293台戰車、3,166台裝甲車、604門火砲系統、201台多管火箭車、93組防空系統、204隻軍機、170隻直升機、2,206台各式車輛kah油罐車、13台艦艇、476隻無人機、43个特殊設備kah 110粒巡弋飛彈。俄羅陸海空軍chiah-nī慘重ê損失,敢是俄羅軍為tio̍h保衛家己ê國家,不幸佇俄羅境內hō͘有侵略性koh好戰ê『北約』軍隊拍損去ê?當然m̄是!全部佇烏克蘭境內。你講,俄羅敢m̄是做賊喝掠賊!」

廣告/聖經充滿我-經文填充本

我有話要說