Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◉Lâu Li̍p-jîn
Sian-ti Iâ-lī-bí tùi Iâ-lō͘-sat-léng siá-phoe hō͘ Nî-pò͘-kah-nî-sat tùi Iâ-lō͘-sat-léng lia̍h-khì Pa-pí-lûn iáu oa̍h–teh ê tiúⁿ-ló, chè-si, sian-ti, í-ki̍p só͘-ū ê jîn-bîn…Siōng Chú — Bān-kun ê Thóng-sòe, Í-sek-lia̍t ê Siōng-tè kā só͘-ū tùi Iâ-lō͘-sat-léng siū-lia̍h khì Pa-pí-lûn ê lâng án-ni kóng, “Lín tio̍h tī Pa-pí-lûn khí-chhù tòa, chèng-choh, chia̍h chhut-sán ê mi̍h, chhōa-bó͘ siⁿ-kiáⁿ, hō͘ lín ê hāu-siⁿ cha-bó͘-kiáⁿ kiat-hun, ióng-io̍k chú-lú. Lín tio̍h tī hia siⁿ-thòaⁿ, m̄-thang hō͘ lín ê jîn-kháu kiám-chió. Lín tio̍h ūi kā lín liû-hòng khì ê siâⁿ-tìn kiû pêng-an, ǹg Siōng Chú kî-tó, in-ūi hiah-ê siâⁿ-tìn pêng-an hoân-êng, lín chiah ōe pêng-an hoân-êng.” (Iâ-lī-bí su 29:1, 4-7)
往過佇台南神學院教冊ê王貞文牧師有一篇台文小說〈天使〉。故事大概是án-ne：
佇1955年，台灣戒嚴ê時期，有一个牧師拜託添木（主角）佇教會畫一幅壁畫。圖ê內容：兩个細漢囡仔，相牽行佇一條破橋頂面，橋下有瀑布，看起來真危險。佇兩个囡仔後面，占畫面真大ê空間，是一个有翅、穿白衫ê天使。佇畫圖ê期間，添木漸漸kap教會ê青年熟識。有一个青年，人攏叫他「凍酸–ê」，愛看禁冊。有一工，「凍酸–ê」提幾若本尪仔圖ê冊來，冊攏是畫勞動ê工人、可憐ê囡仔、散赤人ê生活。添木因為當leh畫圖，需要參考，就佇一本簿仔內描一寡起來。想袂到壁畫完成無偌久，「凍酸–ê」失蹤，濟濟人hông掠去問，添木mā因為遐ê圖受關12冬。自hit-chūn開始，伊無koh相信有天使。伊講：「你無佇遐，當我需要你ê時，你無佇遐。」這是添木受掠ê心情。出監了後，添木開始新ê生活，一个無眠夢、無回憶、只求生存落去ê生活。故事ê結局如何，請咱thang去圖書館借來看。
台灣hông殖民ê經驗，thang講是tùi 16世紀就開始，經過荷蘭、西班牙、鄭成功、清國、日本直到戰後ê國民政府ê時代。所以有時佇台灣ê處境來讀聖經，對台灣人來講，可能lóng有真特別ê感觸。耶利米書29章第1節講，先知耶利米寫批ê對象是一群受到巴比倫殖民統治ê以色列人。4～6節，先知ê話顯出tùi未知ê未來ê絕望：「以色列ê上帝按呢講：『恁tio̍h佇巴比倫起厝住，種作，食出產ê物，娶某生子，hō͘恁ê後生查某子結婚，養育子女。恁tio̍h佇遐生湠，m̄-thang hō͘恁ê人口減少。』」意思是，上帝佇短時間內面，無按算beh kā in拯救。
殖民地ê人民hông欺負kap壓迫。咱也thang tùi但以理書ê記載來看，受殖民統治ê以色列人，hông逼tio̍h學習巴比倫ê語言、文學、文化。台灣人欲了解以色列人受殖民ê處境，無kài困難。
佇日本時代，台灣人必須學日本話；國民政府來，台灣人必須「講國語」。好好活落去，tùi受殖民ê人來看，親像不過是追求thang過尚高生活ê期待。「囡仔人有耳無嘴」，m̄-thang凊彩tō想beh表達意見，因為統治者會用盡手段去消滅一切kā伊對抗ê思想kap作為。親像添木，因為畫一寡圖，tō hông關12冬，活佇無助ê困境中間。雖罔伊無偌久進前chiah畫出一幅有天使ê圖，佇他ê心內，是無koh相信有天使。
總是，受掠ê以色列人民所面對ê生活，kám chiâⁿ-si̍t chiah-nī-á無盼望？咱若繼續讀，29章12～13節，有一段真重要ê提醒，是上帝留hō͘佇苦難中間ê人ê大向望：「恁求叫我，向我祈禱，我會注意聽。恁若尋求我，恁會尋tio̍h；恁若全心尋求我，我一定會hō͘恁尋tio̍h。」雖罔上帝ài in佇巴比倫好好á生活，總是上帝叫in m̄-thang袂記in家己是上帝子民ê身分。上帝子民ê身分hō͘ in有脫離困境ê向望。
身分認同ê議題mā是佇台灣生活ê人民teh面對外來殖民政權ê時陣無法度閃避ê議題之一：「我是日本人á-sī清國人？我是中國人á-sī台灣人？」這tùi蹛佇這塊土地ê真濟人來講，親像迷宮，chit-má iáu無法度tùi彼內面走出來。
「天使kám有佇遐？」Ùi台灣ê歷史來看，ùi殖民、戒嚴到佇民主時代，雖罔佇無kâng ê時期有語言kap文化同化，總是通過一擺koh一擺tùi台灣認同ê重新起造，hō͘咱看tio̍h tòa佇這塊土地ê百姓ê韌性，mā hō͘現在ê咱thang欣賞台灣多元ê媠。我相信上帝ê應允永遠袂改變。上帝m̄-nā對早前ê以色列人講話，上帝今仔日mā仝款tùi咱講：「恁求叫我，向我祈禱，我會注意聽。恁若尋求我，恁會尋tio̍h；恁若全心尋求我，我一定會hō͘恁尋tio̍h。」願上帝賞賜咱平安。
