文圖◎王貞文
細漢 ê 時，我寫詩，記錄落雨 ê 聲音，為眠夢 ê 景緻添寡色彩。媽媽為阮讀詩，聖經 ê 詩篇 kah 楊喚 ê 詩。爸爸佇阮家族 ê 相簿內，用泰戈爾（Rabindranath Tagore）ê 詩句來裝飾。
He 是台灣佇戒嚴 ê 時代。父母用媠 ê 事物 kah 良善 ê 心保護阮，將政治壓迫 ê 暗影隔離佇阮 ê 世界外面。彼時，我 ê 詩天真快樂，所用 ê 語言，是阮盡力學習中 ê 華語。
少年 ê 時，我寫詩，為著暫時逃脫憂悶、受壓制 ê 中學生活。用青春苦悶 ê 筆，一劃一劃刻佇簿仔頂。開始會反抗強權，想欲唱出自由 ê 歌，總是無膽，內心驚惶。彼時，我 ê 詩感情憂鬱，字句平凡。所用 ê 語言，是讀冊 kah 學校 ê 生活所用 ê 語言。
台灣猶原佇戒嚴 ê 時代。美麗島事件互人對台灣 ê 民主前途感覺真悲觀，總是 mā 因為安呢，「m̄ 甘願」ê 心醒起來，奮鬥 ê 意志出現。
佇教會內，阮用台語唱詩歌，深刻 ê 詩句，時常佇奮鬥 kah 爭戰 ê 時，溫柔出現佇內心 ê 戰場：「有時咱經過美麗清靜河墘，樹木真青翠 ê 路邊……免煩惱，心平安！」「至聖 ê 主，歡喜 ê 光，這光袂暗，久久長長。」
我唱：「敢採遇著憂悶試煉」，我唱：「願我會愈疼祢」，我唱：「一滴一滴 ê 水，成作海遐大，一粒一粒土砂，成作地與山」。我愛此個字句：「吞忍聽候」，「讚美我主至大仁義」，「慈悲愛疼大人君」，「上帝愛疼贏過一切」，我愛「青翠草埔」、「安靜水邊」、「死蔭山谷」、「對敵面前 ê 筵席」。
台語，對我來講，是「神聖 ê 語言」，是禮拜 kah 靈修 ê 語言。
總是，我自己一直無用台語寫作，直到世紀末，直到一個新世紀 ê 開始。
頂世紀末，經過奮鬥 kah 爭戰 ê 年代，民主人權 ê 意識在增長，我 ê 世界在擴展。用新學著 ê 語言，英語 kah 德語，我認識廣闊 ê 人類世界，用新 ê 眼光 kah 好奇 ê 心，我去到歐洲，佇德國學習神學。
離開故鄉，無 koh 使用我 ê「神聖 ê 語言」ê 時，我才開始用台語來寫作。起頭是自己恬恬寫，並無發表 ê 慾望。真緊，有一群人來作伴，台文雜誌一本一本出現。新開始 ê 電腦網路，提供互相交流 ê 機會。佇網路會當形成寫台文 ê 社團，無論人佇台灣，佇美洲，佇歐洲，寫寫咧，囥佇社團裡面，就有寫詩 ê 同伴會來讀，來討論。
佇新 ê 世紀開始 ê 時，有一陣，我真正「日日有詩」。宋澤萊發表他 ê 詩論，認真導頭來寫詩，mā 認真讀阮真無成熟 ê 詩，提出真有意義 ê 建議。通過社團，熟識一寡用台語寫作 ê 前輩，mā 看見幾位少年人怎樣用熱情來重新追揣台語 ê 媠，怎樣打拚來寫。我 ê 詩，佇此款互相激勵 ê 情境中，漸漸發穎（puh-íⁿ），佇本來料作枯焦 ê 枝，今有樹莓，有新葉，一葉一葉發出來。
佇這個時期，對我來講，台語由「神聖 ê 語言」，轉化作連結、轉化 kah 互人得著自由 ê 語言。我學習用這個語言來觀看我 ê 生活，來表達這個世界所發生 ê 代誌。我排列字句，享受 in ê 音韻 kah 節奏，享受 in 所代表 ê 土地情感。
我用台語寫出佇異鄉異地 ê 生活感受，我用台語回想細漢 ê 時所經驗 ê 一切，我用台語記錄內心極大 ê 衝擊。逐日逐暝，我內心流出詩句，有 ê 破碎無完整，有 ê 是孤單 ê 一葩火，無一定會當形成一首詩。不過，抾抾咧（khioh-khioh-leh），磨磨咧，mā 有百幾首完整 ê 詩。
今我選出 40 首來出版。感謝「島鄉」ê 陳金順邀請，用他 ê 熱情促成這個事。
有袂少詩，是先發表佇「島鄉」台文雜誌。陳金順本身就是一位真優秀 ê 台語詩人，我愛讀他 ê 詩，信賴他 ê 判斷。
10 冬來，有袂少朋友在問我 ê 詩集 ê 代誌。我因為工作無閒，無真參與台文 ê 社團，有濟濟事互人心真忝，真無力，所以無真願意出版詩集。
這兩冬破病，對自己生命 ê 脆弱 kah 有限有較深 ê 體悟，想欲整理自己人生行過 ê 路。過去感覺無需要整理 ê，充滿感情，複雜 ê 內心世界，佇面對死亡 ê 時，需要整理好。
越頭來看我佇世紀交接 ê 時所寫 ê 詩，記錄一段豐富、趣味、充滿熱情 kah 盼望，心靈行出束縛、得到自由 ê 人生階段。所以，我無 koh 躊躇，應允欲來出版，koh 貢獻一寡圖，為這本詩集作插圖。
詩集名《檸檬蜜茶》，是島鄉台文工作室 ê 陳金順先生所建議 ê。《檸檬蜜茶》是幾首關係愛情 ê 詩中間 ê 一首。我自己重新來讀，mā 感覺真有酸甘 ê 滋味。向望讀者 mā 會當作夥佇詩 ê 世界中得到安慰與激勵，作夥來飲一杯酸苦甘甜 ê 歲月。
