【那teh褪色ê台灣俗語話】拍狗mā-tio̍h看主人!

Phah-káu mā-tio̍h khòaⁿ chú-lângPhah-káu mā-tio̍h khòaⁿ chú-lâng

Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型,配合Firefox瀏覽器來讀

◉李南衡

福伯講:「立法院民進黨團向經濟部、資策會調閱資料,民眾黨新竹市長參選人高虹安批評講che是『綠色恐怖元年』。高虹安否認資策會ê錢主要是公家出ê。伊講,一个政府出資比率無夠5成ê財團法人,伊ê預算、決算無屬立法院審查ê範圍。對chit點,經濟部反駁指出,資策會每年ê預算來源,絕大多數ùi政府來ê,特別是當年高虹安ê資策會研究計畫,經費100%是經濟部提供ê。莫怪柯建銘會講,資策會預算書雖然無必要送立法院,但是董、監事攏是由經濟部指派,政府有實質ê控制力。以111年作例,資策會ê營收45.78億,其中 ùi政府來ê補助kah委辦ê有34.9億元,所占ê比率約76.2%。所以,9月28,民進黨團總召柯建銘才會大聲批評:『高虹安心急、心虛,心肝亂操操,才會一直講m̄-tio̍h話,想講用聲量to̍h ē-tàng掩蓋虛假,伊應該誠實面對家己kah事實。』」

福伯笑講:「Chit聲bē ti̍t 矣!身兼民眾黨主席ê台北市長柯文哲講:『伊kah柯建銘熟似20外年,真少看伊公開場合用chit種攻擊性ê字眼,感覺真奇怪,到底發生啥物代誌?』柯文哲講:『Koh khah奇怪ê是老柯kah老郭(鴻海創辦人郭台銘)kah我關係攏bē-bái,beh拍高虹安無管按怎mā tio̍h sió-khóa看一下伊後面兩个頭家,所以我對柯建銘ê舉動,感覺真奇怪。』」

福伯講了,問我敢有看tio̍h chit條新聞?我應講,當然有。我請教福伯:「民眾黨主席柯文哲m̄甘in民眾黨提名ê新竹市長參選人高虹安hông修理,咱當然ē-tàng理解,伊若講一句咱台灣ê俗語話『拍狗mā-tio̍h看主人』(Phah-káu mā-tio̍h khòaⁿ chú-lâng.)」敢m̄是簡單koh明瞭?講kah lò-lò tn̂g創啥?」

福伯聽了大笑:「Che tio̍h是柯文哲黨主席ê本色,伊對無合意ê人,啥物垃圾話mā攏罵會出嘴,甚至罵人『去死」。但是伊對民眾黨新竹市長參選人高虹安惜命命咧,ná有可能講出chit句台灣俗語話,kā高虹安參選人比並作狗?」我順續問福伯chit句台灣俗語話是按怎來ê。

福伯講:「早前佇台灣有真濟有錢有勢、抑是作官ê,愛飼狗,koh愛chhōa狗出門。狗靠主人惡,會凌遲人,甚至beh kā人咬。一般人氣佇心肝底mā m̄敢按怎,免講當然mā m̄敢出手kā拍,驚得罪tio̍h狗主人,所以才有『拍狗mā-tio̍h看主人』chit句台灣俗語話流傳落來。Chit句「拍狗mā-tio̍h看主人」若tú-tio̍h親像柯文哲黨主席chit款人,m̄敢講、無愛講á-sī bē曉講,漸漸tō ē消失去。

我有話要說