Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◉周瑞雅
浪漫ê 4月天，𨑨迌當著時，今仔日騎著o͘-tó-bái來去西港、佳里kap將軍𨑨迌，來享受春天ê媠……
沿路ê景緻攏足迷人，路邊開kah紅絳絳ê花蕊，果子黃錦錦ê仙桃樹欉，巴洛克式ê建築，古色古味ê三級古蹟金唐殿，真有氣氛ê ka-pi店，有意思ê招牌口號，攏hō͘人心情起毛婸！來佳里當然愛來佳里地政事務所，kā阮台語文化班ê班長相借問！班長講欲𤆬我去將軍一个真特別、真藝術ê「廣山窯」欣賞柴燒ê生活美學！我真期待，我真hòⁿ-hiân到底什麼是「廣山窯」？雖然這是臨時安排ê行程，煞是一个上蓋美麗ê意外，夭壽媠氣ê行程，到今阮ê心情猶是足感動hām樂暢ê！
對網路濟濟資料了解著柴燒是人和塗，塗和窯ê對話，用柴做燃料，佇1300度左右ê高溫，用上自然ê材料，來表達作者特別ê美感kap塗hām火ê智慧，迷人ê所在就是佇變化多端ê自然美感中發展屬佇作者家己ê風格！
一塊原本無路用、無價值ê塗，經過老師神奇ê手，閣有柴kap火ê磨練，成做有路用、有價值、甚至是媠閣珍貴ê藝術品！柴燒瓷仔對無到有，千變萬化，無完全完美ê，干焦有獨一無二ê，咱人mā hām柴燒瓷仔仝款，逐家攏是珍貴ê，ài經歷真濟遍ê磨練，chiah ē-tàng成做珍貴ê藝術品！精彩ê人生，m̄-tō是佇一遍閣一遍ê磨練過程中累積來ê！
誠歡喜ē-tàng熟似窯主老師，雖罔kap窯主老師是頭擺見面，毋過阮有仝款ê信仰，閣互相分享信仰，煞saⁿ-kap感動kah流目屎，誠歡喜有這个遮爾仔媠ê分享！人生上好ê旅行，就是走揣一種感動！這擺ê旅行真正是感動滿滿！多謝窯主老師kap班長送ê柴燒茶甌藝術品。
佇遮阮mā用七字押韻ê詞句來回應感謝窯主老師kap班長ê心意：「手工柴燒誠藝術，千變萬化蓋突出，捏做茶甌手路滑，啉茶欣賞齊傑出。」今仔日真正是恩典滿滿ê一工，心肝穎仔足燒烙！
