◉陳柏壽
昴（báu，すばる，subaru）本是太陽系外一粒khah無人注目ê恆星。谷村新司（Shinji Tanimura）寫這首〈昴〉了後，用伊淒涼歌聲唱出「再會啦！咱做伙離開這个艱難困苦稀微ê世界，ǹg彼个遙遠ê快樂ê天星昴進前！」伊ê歌聲引起真濟世間孤單失望無助ê人心內ê共鳴！
路加福音19章描寫，有一日耶穌ùi莊過，全莊大細攏來大路邊beh看耶穌。矮仔撒該tòe佇人ê尻川後，看袂tio̍h，煞peh去佇路邊彼叢桑材頂，佇山頂看馬相踢，一清二楚，實在有夠爽，閣無人看tio̍h，安心等耶穌。無疑悟，耶穌一影就看tio̍h樹仔尾溜ê撒該，出聲叫講：「撒該撒該！緊落來！我 eng-àm beh去恁厝食飯！」
聖經雖然寫講撒該是一个稅吏是一个罪人，其實伊是一位真單純ê人，kah你我攏共款。耶穌叫伊ê名ê時，無論伊peh khí–lih樹仔尾溜，或是ùi樹仔頂pê落來，可能伊心內第一ê反應，豈是耶穌beh來chhōe伊ê麻煩？因為伊毋知耶穌真正ê動機。但是伊出佇單純ê心，無第二句話，就來接納耶穌。按呢做就是出佇伊單純ê意志kah衝動，伊接受ê是上帝忽然來ê恩典，因為上帝ê恩典時常是人想袂到ê時，忽然到位。
禮拜日，咱去禮拜堂聽順耳ê講道。美麗ê音樂聲，有影是真安心kah快樂ê代誌，這kah peh khí–lih樹仔頂，閣peh落來樹腳chhōe耶穌，toh一項khah困難？咱佇禮拜堂廳罵稅吏是khah簡單，但是beh叫咱peh khí–lih樹仔尾溜看耶穌，就無幾个人做會到。
去hō͘耶穌叫tio̍h ê撒該緊ùi樹仔尾溜soan落來，心內歡喜到袂顧得。世間人對這个抽餉ê稅吏，一向攏無啥物好感，料想袂到，耶穌竟然親自點名叫伊，閣講beh去in兜食飯。世間人看毋值ê人，顛倒去hō͘上帝特別注目，顛倒去互hō͘上帝特別關心。去hō͘上帝關心ê撒該另外一項hō͘咱tio̍h驚ê代誌是，伊soah kā耶穌講：「主啊，我beh將我所有ê財產ê一半送hō͘散赤人，我若是有欺負、勒索、搶奪別人，我beh四倍賠人！」這是比律法上規定ê份額閣khah濟。當人領受上帝ê恩典ê時，當人ê靈性醒起來ê時，毋是干單反悔過去，是beh還，beh回報閣khah濟ê濟。耶穌就按呢宣布撒該欲領受閣khah濟ê恩典kah拯救。上帝就是用按呢來款待咱世間所有有罪ê人。
資本主義世界ê中心，是保護私人財產；共產主義ê中心對待有錢人ê方法，是清算鬥爭。撒該這款有錢人無必要經過清算鬥爭，自願就將家己ê錢吐吐出來。佇美國，歷史以來，遐ê有錢人除了遺產稅以外，真濟攏佇死前將伊chhun ê財產，奉獻hō͘ in家己ê美國社會，美國ê錢自然留佇in ê社會內面，in攏毋免經過清算鬥爭。撒該顯明ê就是一種做人ê良心ê顯現，也是表明資本主義社會自然運作ê方式。
另外一面咱ē-sái看撒該親像天頂彼粒遙遠無啥人對重注目ê天星「昴」，雖然伊恬恬停佇hia，親像撒該按呢無人看重，m̄-koh確實伊是一个真重要ê存在。伊指示咱欲去彼个方向，咱tio̍h khoán–khoán leh，ǹg彼个雖然遙遠但是美麗ê所在，莫得驚惶，做伙進前閣再進前！
