【台文世界】台灣好風景

◉黃翠玫

若是講tio̍h旅行,我規个人就活跳跳,因為我ê身軀充滿愛旅行ê細胞。結婚前我已經去過美國丶歐洲、中國、東南亞、澳洲、紐西蘭、日本kap韓國,算算超過14个國家。阮媽媽講我世界行透透,我ê人生已經有價值啦!結婚後,生子,為tio̍h家庭暫時無法度自由自在去旅行。我想,等囡仔大漢kap我退休,我就ē-sái雲遊四海。人算不如天算,退休煞拄tio̍h新冠肺炎,因為疫情無法度出國,實在鬱卒,親像消風ê ke-kui完全無氣力。

忍耐二冬半,實在擋袂牢,提出上大ê勇氣,酒精攢hō͘便,決定出發去美麗ê台東遊覽。駛入新ê南迴公路,秀麗ê高山就佇阮ê四邊,風景優美迷人,看著深藍色ê海面,阮知影已經盤山過嶺來到台東。

第一站是多良車站,ē-sái看tio̍h美麗ê山、白色ê海湧kap開濶ê海面陪火車過磅空,真希奇特別ê畫面。第二站來鹿野高台看熱氣球升空,足濟形狀kap色彩ê熱氣球寬寬仔飛上天,hō͘這个山中ê高台真鬧熱。聽講一个熱氣球價值三百萬到一千萬攏有,真正是賺tio̍h啦!

第二日阮坐船去火燒島,火燒島以早是關政治犯ê所在,這馬是觀光景點。阮租機車來沓沓仔欣賞這个特別ê島嶼,沿路是吸引人ê將軍岩、哈巴狗、睡美人,kap白色ê綠島燈塔,閣有朝日溫泉。海邊足濟人佇遐耍水kap藏水,去火燒島當然tio̍h去人權紀念區,思想為人權奮鬥ê前輩,才有意義。第三日去伯朗大道體會金城武廣告ê那種自在、無煩無惱ê感受。真正親像佇天堂,空氣好、四邊是山好景緻,日光照來、涼風吹來,煩惱正港攏無去。慢慢騎鐵馬踅來踅去,這是山中世外桃源。Kap出名ê伯朗大道地標翕相,做一个美麗ê紀念。

台灣ê風景袂輸外國,咱用心來看,用心來感受,台灣ê媠ē hō͘你感動。

廣告/聖經充滿我-經文填充本

我有話要說