Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◉高嘉徽
Ū chi̍t ji̍t, i kāng-khoán chò i-seng ê khang-khòe, bô siūⁿ hiah-nī chē, hā-pan liáu tō beh tńg-khì chhù chia̍h-pn̄g. Tī i tńg-khì chhù ê lō͘–ni̍h, hiông-hiông lo̍h tōa-hō͘, hit-sî i chhoah-chi̍t-tiô, ko͘-put-chiong iōng phāiⁿ-á cha̍h i ê sin-khu, m̄-koh in-ūi hō͘ chin-chiàⁿ lo̍h siuⁿ tōa-chūn, i teh beh tòng-bōe-tiâu.
Tō tī chit sî, sih-nah teh siám-sih, lûi-kong tân tē 3 siaⁿ ê sî, i soah hun-khì. Lí kóng, i thài-ē hiông-hiông án-ne, kî-si̍t i hō͘ sih-nah tiān–tio̍h, tiān chi̍t ē sí-sí-hun-hun–khì.
Ū lâng khòaⁿ-tio̍h i tó tī hia, tō kín kiò kiù-hō͘-chhia kā i sàng-khì pēⁿ-īⁿ. Hó-ka-chài, keng-kòe tī-liâu liáu-āu, i koh hôe-ho̍k cheng-sîn teh khòaⁿ-chín.
M̄-koh, chū i hō͘ lûi-kong kòng–tio̍h liáu-āu, i it-ti̍t siūⁿ beh tôaⁿ kǹg-khîm, i mā m̄-chai in-toan chhut tī tó-ūi.
Sui-bóng i sè-hàn ê sî khak-si̍t ū o̍h-kòe kui tang ê kǹg-khîm, m̄-koh āu–lâi ê ha̍k-gia̍p hō͘ i si̍t-chāi ū-kàu bô-êng, tō bô koh kè-sio̍k o̍h khîm ah.
Koh kóng tńg-lâi, tī i hō͘ lûi-kong kòng–tio̍h liáu-āu ê bó͘ chi̍t kang, i tī hioh-khùn ê àm-sî, phah khui khîm-kòa, chhōe chhut Beethoven ê khîm-phó͘ lâi tôaⁿ. Eh? Sī-án-chóaⁿ tôaⁿ liáu chiah sūn–tio̍h? Liân i ka-tī mā m̄-chai–leh!
M̄-koh i ū chi̍t ê chhiong-tōng, tō-sī siūⁿ beh it-ti̍t tôaⁿ–lo̍h-khì. Só͘-pái i liân i khui ê chín-só͘ tō koaiⁿ–khì-lâi. I ê bó͘-kiáⁿ mā sa-bô-cháng! Án-ne, I ū hoat-tō͘ chi̍t kang liān chhiau-kòe 12 tiám-cheng ê khîm, tiāⁿ-tiāⁿ liān khîm liān kàu bô chia̍h-pn̄g mā bōe kám-kak pak-tó͘ iau.
Koh khah hō͘ lâng siūⁿ bô–ê sī, i kā i ê pêng-iú kóng, i beh khì ta̍k kok pān ián-chàu-hōe, kā in kóng, nā-sī chhōe bô i mài siuⁿ ì-gōa.
Bóe–á i chin-chiàⁿ ū-kàu lī-hāi, liān kah kó͘-tián ê siáⁿ-mi̍h khek lóng ē. Tō chū-ngó͘ thui-chiàn khì pat kok khui im-ga̍k-hōe.
Chit ê kò͘-su sī chin-lâng chin-sū kái-pian ê. Chhián lí khì tha̍k Anthony Cicoria ê kò͘-sū chiū chai. Liān kúi nā tang kǹg-khîm ê góa, mā bô châi-tiāu tī chèng-sek ê bú-tâi téng piáu-iáⁿ–neh!
Si̍t-chāi sī chin koài-kî, hit ê i-seng goân-pún ê thâu-lō͘ tō bô chò–ah! Piàn-chiâⁿ chi̍t-ê lú-hêng sè-kài ê chôaⁿ-chip kǹg-khîm-ka!
