◉郭文玄
冬節時，
團圓食圓仔的日子
兩个節氣了後是過年
無論大人囡仔，無論偌遠
無論天寒落雨透大風
家族至親圍爐，上溫暖的暗暝
一九四七年的冬節
至親失蹤無消無息
食圓仔無望，望圍爐
一九七七年的冬節
起大風湧的鄉土
政治─文學論戰
鼻會著硝煙味的鐵窗內
註定，無法度圍爐的暗暝
一九九六年總統全民直選了的冬節圓
鐵窗的記持 + 親情的暗暝
向望土地頂懸，莫閣強權
予骨肉散離
二○？？年的冬節
會是啥款的冬節圓
猶是青天下跤的日頭圓？
是人民同命共生，相楗出來的台灣圓？
抑是日月無光，暗夜的五星圓？
（作者為台文創作者）
