Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◉李南衡
福伯看tio̍h我，tio̍h大聲喝講：「情理不平，氣死閒人！（Chêng-lí put pêng khì sí êng-lâng.）」我問講：「到底啥物情理偌呢不平，害你chit ê閒人氣kah beh死？」福伯應講：「Tio̍h是俄羅侵略烏克蘭chit項代誌。俄羅chit ê大國那會使凌遲烏克蘭chit ê小國？土地人ê 57倍大、人口人ê三倍半濟，戰鬥機人ê 23倍濟、小型軍艦人ê 16倍濟，大國去侵略隔壁家己講ê『兄弟之邦』，莫怪世界一大堆國家氣kah beh死。咱台灣俗語話講『情理不平，氣死閒人！』氣死mā無效，tio̍h伸手支援烏克蘭才有救。你聽我分析hō͘你聽。」
「今年2月24，俄羅出兵侵略烏克蘭，講是俄羅佇烏克蘭展開ê「特殊軍事行動」。第二工，美國tio̍h隨時支援烏克蘭3億5000萬美金ê武器，包括600套「毒刺」防空系統、2600套「標槍」、4門反火炮kah反無人機系統跟蹤雷達、4000萬發小型武器銃子kah 100萬發手榴彈等，其中上厲害ê是「毒刺」防空飛彈，會使講是俄羅空軍ê惡夢。造價美金4萬箍ê「毒刺」防空飛彈去拍千外萬美金ê俄羅軍用直升機；「標槍」反坦克飛彈ē tàng打擊2500公尺內ê裝甲目標，m̄是拍頭前ê厚鐵枋，是ùi頂頭直直彈落去炮塔ê頭頂，追蹤系統會jek到tio̍h目標為止，是俄羅坦克ê殺手。美國chhōa頭ê「北大西洋公約國」相續支援烏克蘭各種上新ê武器。」
我插嘴問講：「『北約』國家敢ē-sài算是『閒人』？」福伯想想一下應講：「算是『半閒人』。因為烏克蘭一直想beh加入『北約』，『北約』國家beh假那m̄，俄羅講『北約」一直向東侵入，烏克蘭有想beh加入『北約』，所以才拍烏克蘭，那像是『北約』國家害tio̍h烏克蘭，所以英國、法國、德國一寡『北約』國家mā拚勢支援烏克蘭真濟上新ê武器。」
我問講：「啥款ê國家才算是真正ê閒人？」福伯講：「『北約』國家kah『歐盟』國家攏bē-sái算是『閒人』，抑是kah俄羅生理做真大抑是關係誠好ê國家，像講中國、印度、伊朗等國家mā攏bē使算是『閒人』。真正完全kah俄羅抑是烏克蘭無關係ê國家，像講日本、台灣、以色列、澳洲等國家才算是真正ê『閒人』，除了澳洲有提供超過7500萬美金ê致命軍事設備，其他ê國家攏kan-taⁿ提供經濟上kah人道上ê支援。像講咱台灣政府有捐2300萬美金，國人愛心捐3300萬美金以外，人道援助方面，2月28咱台灣援助27噸醫療用品、3月17援助650噸約3萬1000箱ê民生用品。」
福伯笑講：「俄羅派兵侵略烏克蘭，m̄-nā氣死閒人，相信mā會氣死一寡可憐ê俄羅官兵，作鬼tō猶m̄知是hō͘叼一國ê銃子拍死–ê。」
