Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◉王美書
尼哥德慕tī約翰福音攏總出現三擺。3章1～21節是伊tī暗暝拜訪耶穌；第7章路尾伊tī公會；tī 19章，伊tī耶穌ê身屍邊仔。無論tó一个階段，攏kap烏暗有關係。一開始是時間ê烏暗，tī暗暝。接續是公會內面，偤太宗教領袖beh刣死耶穌，人性ê烏暗。路尾，是耶穌死亡ê烏暗。這三段安排表明光beh進入世間、beh進入烏暗。尼哥德慕ê信仰是tī烏暗中開始–ê。
一、對話焦點──重頭生ê意義
尼哥德慕tī一个暗暝來見耶穌。伊是法利賽派ê人，koh是偤太人ê領導者。結果伊來見一个加利利出身ê木工。有人講，尼哥德慕tī暗暝偷偷仔來，表明伊無膽á-sī驚人議論，m̄-koh，咱tio̍h注意，尼哥德慕m̄-sī對耶穌完全m̄-bat。伊來進前，耶穌m̄-nā行第一個神蹟kā水變做酒，koh tī Pôaⁿ-kè-choeh beh 到ê時清氣聖殿。25章22節，講起tī節期中有濟濟人看見耶穌行ê神蹟就信伊。Tī這款基礎，尼哥德慕前來拜訪耶穌。
尼哥德慕稱呼耶穌是拉比，伊講耶穌是對上帝hia來–ê。尼哥德慕承認耶穌所做ê因為有上帝同在。耶穌知影尼哥德慕對伊ê認捌，就講起上帝國ê代誌，耶穌teh教導這位有正港偤太神學訓練ê先生。
耶穌代先講起，人nā-sī beh看見上帝ê國，條件是「têng chhut-sì」（重出世）。咱對尼哥德慕ê回應有啥物感覺？真好笑？á-sī真有同感？關鍵在têng chhut-sì這字ê解說。têng chhut-sì，這个重頭ê字（άνωθεν）本身有「對頂面來」kap「koh一擺」這兩種意思。咱ê聖經翻譯，無論是「têng chhut-sì」 á-sī 「têng thâu-siⁿ」（重頭生），攏khah接近「koh一擺」 ê意思。所以，尼哥德慕ê提問真有道理。
耶穌回答講，信仰ê活命是對聖神所生ê，m̄-sī人家己tō ē-sái完成á-sī成就。人ē-tàng têng chhut-sì，是一份奧祕ê禮物。耶穌tiāⁿ-tiāⁿ用一般生活中ê代誌來講起上帝超越ê疼kap恩典，譬如：出世、水、米糧、光、羊等。Tī約翰福音，肉體無負面ê意涵，che kap保羅ê思想有精差。約翰福音講，對肉體生ê屬於肉體（3章6節），意思就是講，對上帝hia tit-tio̍h肉身這份禮物。對聖神生ê屬tī聖神（8節），意思就是講，是對上帝hia tit-tio̍h永遠活ê禮物，對現在開始性命tit-tio̍h轉換。
聖神是上帝ê權能以及活命，運行tī受造物頂面來轉化受造ê。Chóng–sī，聖神tī tó-ūi、怎樣來做工?聖神ê工作有兩種極端bô-kâng ê表現。
二、聖神ê兩種工作類型
（一） 聖神親像風，照自己ê意思吹。無論是希臘文á-sī希伯文，風kap靈攏是仝一字 (πνευμα/;xWr)。聖神用hō͘ 人tio̍h-kiaⁿ kap 引起擾亂ê方式tī世界運行，超越控制、改變人ê理解。Bô任何規章kap傳統ē-tàng制限聖神。聖神充滿khùi-la̍t koh無法度預測，親像火，hō͘人sio-lō，光照黑暗。
（二）聖神kap組織有關。一方面，聖神降臨tī教會，一方面koh賞賜恩典，hō͘教會成做恩典ê媒介。Tī基督教群體內面，具體ê禮儀kap實踐成做聖神徛起ê所在—— tī hia，聖神改變個人mā改變群體。通過祈禱、禮儀、善行、外展、愛餐kap共同治理，聖神不斷運作。3章5節，「通過水kap聖神」，水ê其中一个解說是洗禮，人tī教會洗禮，開展新ê性命。通過地上ê代誌—— 水、米糧、酒、油，新ê活命對頂面來。
這兩種聖神ê工作lóng應該受tio̍h承認，m̄-sī 互相衝突抑是消滅對方。
三、尼哥德慕ê屬靈歷程
尼哥德慕是法利賽人、偤太人ê官（公會成員），以色列人ê教師。伊是禮儀kap實踐ê維持者，也是治理偤太人ê政治領袖。若是kap第四章ê撒馬利亞婦人人相比，咱就會發現：婦人人bô名、出身受指責，完全bô政治kap宗教ê本錢。M̄-koh，尼哥德慕tī暝時tiām-tiām來chhōe耶穌。婦人人是tī日時kap耶穌對話，koh ǹg 伊ê同胞為耶穌做見證。通過聖神奧秘ê工作，婦人人確實對聖神來têng thâu-siⁿ。但是，咱bōe-tàng kan-taⁿ停tī chia真緊tō做出結論叫人tio̍h學習這个婦人人、譴責尼哥德慕是固執守禮儀kap傳統ê法律主義。
因為第三章所講ê，只是尼哥德慕ê信仰ê第一章。伊彼時認為耶穌是拉比，伊kap耶穌論重頭生有深入ê對話，上要緊ê是，têng chhut-sì是聖神ê工作。聖神ê風pûn對尼哥德慕hia去。到搭寮節ê時，耶穌教示人，引起逐家討論伊ê身分，tī搭寮節ê最後一日，耶穌ài 喙焦ê人kàu伊hia啉，koh講信伊ê人ū活水ê溪ē tùi信ê人ê腹內chhèng出來。Che是teh講信伊ê人beh領受聖神。群眾聽了chiah-ê話，有人開始認為耶穌是先知、是基督，soah起紛爭。宗教領袖beh害耶穌，tī in命令聖殿ê警衛khì掠耶穌m̄-koh失敗ê時，尼哥德慕出聲kā宗教領袖警告講，bōe-sái iáu-bōe查明耶穌有做啥物就kā 耶穌定罪。
尼哥德慕bat tī 烏暗中去就近耶穌，taⁿ，尼哥德慕公開為耶穌辯護。Kap尼哥德慕kāng-khoán做宗教領袖–ê kā chhiàng講：「你kap耶穌kāng黨nih？」叫尼哥德慕查考聖經。雖罔尼哥德慕可能iáu-bōe領受聖神，總是，伊比chìn-chêng khah勇敢，tng伊為耶穌出聲ê時，hit ê 活水江河ê氣力ná 親像流出來。
Hō͘羅馬帝國釘死tī十字架ê犯人ê屍體，若m̄-sī hō͘ 野獸食掉，tō-sī 埋tī khǹg無名屍體ê墓仔埔內面。亞利馬太ê約瑟kap尼哥德慕用非常尊貴ê方式為耶穌埋葬。In真細膩遵趁偤太埋葬ê風俗。約翰福音講亞利馬太ê約瑟是耶穌ê門徒，m̄-koh伊偷偷跟綴，因為驚偤太ê當局ê權勢。尼哥德慕m̄-bat出現tī約翰福音書以外ê福音。Kap約瑟bô-kāng，尼哥德慕公開為耶穌辯護。路尾，tī十字架ê邊仔，這兩人公開家己ê信仰。
福音書無解說in ê動機，可能，in ê驚惶已經轉變做對耶穌ê堅信，mā可能in相信耶穌所預言關係受難ê信息。無論in ê動機是啥，亞利馬太ê約瑟kap尼哥德慕用行動表明in反對偤太ê宗教領袖、反對羅馬帝國。
根據偤太人歷史，偤太拉比迦瑪列 （使徒保羅ê老師）tī 主後53年過身ê時，Onkelos燒約略25公斤ê香料來表示對伊ê尊敬。Onkelos講：「耶利米對西底家講：『人欲為你燒芳ê物，親像為著你ê列祖，就是你以前ê先王所燒ê一樣』。迦瑪列贏過100个國王。」尼哥德慕為著耶穌ê安葬chhoân ê bu̍t-io̍h chhiau tîm-hiuⁿ（沒藥chhiau沉香）約略30公斤。撒馬利亞ê婦人人用喙宣告耶穌是彌賽亞，尼哥德慕親手用芳料kā耶穌抹，用行動宣認耶穌是受抹油ê，正是彌賽亞ê意思。
尼哥德慕m̄-bat放棄hiah ê kā伊塑造ê宗教群體ê禮儀kap好所行。正是通過chiah-ê，聖神teh吹，為尼哥德慕開創空間，hō͘ 伊ē-tàng覺察koh跟綴耶穌。偤太教信仰關係安葬ê法律成做聖神khiā-khí ê所在。通過地上ê代誌，尼哥德慕對頂面重頭生。
尼哥德慕ê信仰旅程是聖神做工ê故事，就是重頭生ê故事。聖神ê工作hō͘ 尼哥德慕有三方面ê變化：伊漸漸jīn-bat耶穌ê身分。拉比、先知、基督、尊榮ê王。伊愈來愈好膽為耶穌做干證。代先是tī暗暝見耶穌，koh來是公開為耶穌出聲，最後冒性命危險替耶穌洗身軀、抹油koh好好埋葬。尼哥德慕願意付出ê代價愈來愈重。咱thang講約翰福音3章21節是對尼哥德慕ê評價：「毋過實行真理ê人接近光，是欲顯明伊ê行為是順趁上帝來做ê。」
起頭，尼哥德慕tī烏暗中去接近真光耶穌。有傳說講起：尼哥德慕是富有koh敬虔ê人，路尾，人民ê征服者（尼哥德慕這个名ê意義）受聖神感化，為耶穌拋命。
