敢作牛,m̄ 驚無犁好拖!

(請安裝Taigi Unicode字形,配合Firefox瀏覽器來讀)

作者:李南衡

早前台灣農業社會,差不多每一個農家 lóng 有飼牛,因為農家需要牛來鬥相仝作工課。牛頷頸掛擔(軛)拖犁來犁田,m̄ 管冬天田水冷霜霜、抑是熱天田水燒烘烘、加上日頭曝田水hah?起來 ê 熱氣真 hō͘ 人食 bōe 消,牛 ê 動作若 khah 慢一絲仔,農伯仔 ê 竹枝仔就 tùi 牛 ê 尻脊 phiaⁿsut 落去。除了耕作以外,載 chhek 載稻草抑是載農作物,mā lóng 是牛 ê 工課;日本猶未來殖民統治台灣進前 kah 統治初期,台灣製糖猶koh照傳統舊方法,用大石磨來磨甘蔗搾取蔗汁,做出粗 koh 無真清氣 ê 粗糖,大石磨 mā lóng 是靠牛來拖動,tī 蔗 phō͘ 內拖石磨一工行幾10公里無歇。牛 ê 辛苦,逐個人 lóng 有看tio̍h ,所以咱台灣才會有:「敢作牛,m̄ 驚無犁好拖。」(Káⁿ chò gû, m̄ kaiⁿ bô lê hó thoa.)chit 句俗語話。Chit 句俗語話延伸 ê 意思是講:一個人若是甘願親像牛 hiah 呢認命食苦,m̄ 免驚無頭路 thang 食。

半世紀以來,科技發展真緊,台灣農民 m̄-nā 生產工具有真大 ê 變化、耕作差不多 lóng 已經進入機械化,「鐵牛仔」──一種掛 iân-jín ê 犁田機代替真 ê 水牛耕作,連改裝 ê 「鐵牛仔車」mā 載貨tī 庄腳四界走。水牛 ê 形影慢慢 tī 台灣農村消失去。將來 ê 台灣人去到猶保留傳統農耕方式 ê 外國農村,看 tio̍h 傳說中 ê 水牛,會趕緊 kā 翕相作紀念,那像4、50冬前日本人來台灣農村看 tio̍h 水牛 ê 心情。

2008年受 tio̍h 國際金融風暴影響,台灣經濟受拖累,大選前講準備好ah ê 馬政府看台灣 ê 失業率一日比一日懸,變無輦(piàn-bô-lián),會使講是「目睭金金人傷重」。選舉前開 ê 支票「六三三」──經濟成長率6葩(6%)、人民平均所得每年美金3萬、失業率降到3葩以下,lóng 總跳票。咱來看失業率 chit 項,馬英九就任第3年 ê 2010年,台灣平均失業率是 5.21%、失業人數差不多是57萬7千人,也就是講,失業率比馬英九競選口號加2.21%。會 hō͘ 人真煩惱、傷心 koh 驚惶 ê 是,20歲至30歲當少年、當有氣力拚勢 ê chit-ê 年齡層,失業率是平均失業率 ê 一倍 khah 加,也就是講超過10葩,意思是講2010年台灣20歲到30歲 ê 人,10個人至少有1個人無頭路。照馬政府講2010年已經比2009年加真好,chiah 按呢!伊那像 lóng bōe 記得,台灣原本是所謂「亞洲四小龍」 ê 頭名,2010年失業率,香港4.0%、韓國3.6%、新加坡2.1%,台灣5.21%卻是上尾名!台灣變chiah 差,馬政府敢 bōe 感覺見笑?

因為時代 ê 進展,真濟年輕 ê 台灣人已經 m̄ 知農業社會牛 ê 功能 kah 苦勞,愈來愈濟人m̄ 知「敢作牛,m̄ 驚無犁好拖」是啥意思;所以若聽 tio̍h chit 句俗語話,mā bōe 曉應講:那有影?台灣有57萬7千外人敢作牛,無犁好拖 leh!

李南衡《那teh褪色的台灣俗語話》(1-2冊 )已經出版,歡迎來交關,做伙進步

我有話要說