【台文世界】Kap Ka-kī Sio-su

Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型,配合Firefox瀏覽器來讀

◉tihtih-hû

Sio̍k-gú kóng: “Sio-mē m̄ bat su, sio-su m̄ bat iâⁿ.” Ì-sù sī kóng, ū ōe ta̍k-ke tōa-siaⁿ hoah-hoah leh tio̍h hó, hô-mi̍h-khó͘ sio-su choh he siáⁿ-mi̍h gōng tāi-chì. Góa tha̍k Anton Chekhov ê sió-soat Sio-su (The Bet), khòaⁿ kìm-pī tiong ê chú-jîn-ong i tha̍k ê chheh ū hok-im su, hō͘ góa siūⁿ-khí góa chêng kā Pa Khek-lé Sèng-keng tòng-chòe Tâi-gí bûn-ha̍k teh tha̍k ê chêng-kéng. Chē-chē kàu-iú kóng he sī thian-su bōe-hiáu liām, góa sim-lāi siūⁿ kóng bô m̄-tio̍h, i to̍h sī thian-su. Chìn-chêng, góa ji̍t kah mê tī chhù-lāi tōa-siaⁿ tha̍k Hiān-tāi Tâi-gú E̍k-pún Sèng-keng, hit chūn góa ná tha̍k chhut siaⁿ, goán bó͘ tō ùi chhù ni̍h cháu–chhut-khì, góa ioh kóng i phàng hiâm góa chhá, m̄-koh i mā m̄ bat kā góa chó͘-tòng.

Sèng-keng kóng: “Góa beh hō͘ Hi-pek-lâi lâng chē ka̍h ná thiⁿ-téng ê chhiⁿ, hái-piⁿ ê soa.” Kó-jiân sī án-ne.

Góa khah bô-hoat-tō͘ chiap-siū lâng in-ūi chong-kàu in-sò͘ to̍h kah Sio-su tiong ê lu̍t-su kāng-khoán iōng kìm-pī lâi chè-hān ka-tī ê hêng-tōng sīm-chì bô beh thoân-chong chiap-tāi (goán lāu-pē kóng che sī pāi-thiāu). Tùi chit hāng tāi-chì, Sù-tô͘ Pó-lô tī Ko-lîm-to Chiân-su ê ì-sù sī: “Ta̍k-ke chīn-liōng to̍h hó (nā-sī án-ne khah-hó).” Pó-lô sī kiàn-gī ê kháu-khì. Ná-ē chit-má ê sîn-hū lóng piàn-chòe to̍k-sin-a leh? Ōe kóng tò-tńg–lâi, Kū-iok mā bô tông-ì sîn-chit jîn-oân sī lú-sèng. Chōe-chōe ê ián-piàn lóng kah keng-bûn piáu-bīn ê jī-kù siong ûi-pōe.

Góa khòaⁿ kò͘-sū ê kiat-bé, lu̍t-su i chit chióng chhòng-tī ka-kī ê hêng-ûi, ū gia̍t-khiat-á-ōe án-ne kóng: “Ok-chhe gia̍t-chú bû hoat khó tī.” Mā ē-sái kóng : “Giâ khí-thok tōng ba̍k-chiu-gîn.” Nā m̄-sìn, sûi lâng khì chhì khòaⁿ-māi leh.

我有話要說