Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◉Kim Ek-phêng
Joa̍h-thiⁿ tit-beh kàu–ah, sio-joa̍h ê thiⁿ-khì, hō͘ ta̍k-ê kiōng-boeh tòng-bē-tiâu–ah. Sio̍k-gí kóng: “Tiāⁿ-tiāⁿ chia̍h peng sim-thâu chheng.” Chit-ê sî-chūn lâi chia̍h peng tng tio̍h-sî.
Peng ū kúi-ā chióng, ū peng-kî-lîm, ki-á-peng, chhoah-peng. Góa siōng kah-ì chia̍h–ê tō-sī chhoah-peng–ah.
Iōng ke-khì kā tōa-tōa-tè, sì-kak sì-kak ê peng-kak, chhoah hō͘ chhùi-chhùi. Peng-iù-á ùi téng-koân sūi–lo̍h-lâi, hoán-siā-chhut chhin-chhiūⁿ soān-chio̍h kāng-khoán ê kong-chhái, sòa–lo̍h-lâi tio̍h-ài lâm thn̂g-chúi, gû-leng-ko kap phòe-liāu.
Góa siōng ài lām âng-tāu-á, bi̍t-tāu, thô͘-tāu-jîn koh ū ō͘-á hām ông-lâi–ah. Chia̍h loeh kàu-té, tiⁿ-tiⁿ koh thàu-sim-liâng, bōe-su sóe kòe ngó͘-chōng-lio̍k-hú, kui-sin-khu ê mn̂g-kńg-khang lóng phah-khui–ah, chin sim-sóng.
M̄ chai-iáⁿ lí kah-ì chia̍h–ê sī tó-chit khoán peng–leh? Thàn joa̍h–lâng ê sî, kín lâi chia̍h peng, siōng hó kā peng chhoah hō͘ koân-koân, phòe-liāu tha̍h hō͘ boán-boán, án-ne m̄-chiah súi-khùi.
