◉林朝成
聖經出埃及記記載，當以色列民族佇埃及作奴隸，受埃及人欺壓、迫害，in 呼求上帝拯救 in，脫離埃及人 ê 手。上帝聽見 in ê 呼求，差摩西 chhōa 以色列民族出埃及，脫離做奴隸 ê 所在，進入流奶 kap 蜜 ê 迦南地，建立新 ê 以色列國。
今仔日台灣面臨中共的武力威脅，中共軍機每日 seh 台灣，威脅、恐嚇，就是愛咱投降，接受一個中國、一國兩制。國民黨認為中國是大國，台灣是小國，台灣一定拍輸中國。事實上 m̄-sī 按呢，咱看烏克蘭 kap俄羅斯相戰，事實上戰爭拍一年啊，烏克蘭並無拍輸，反轉 lú 來lú 勇。因為烏克蘭對總統到全國人民，團結一致，對抗敵人。in 知影，如果無奮鬥，烏克蘭會滅亡。加上歐美民主國家團結起來，支持烏克蘭，所以烏克蘭 lú 拍 lú 勇。
仝款的道理，台灣欲抵抗中國 ê 併吞，首先愛全國上下團結一致，拚生命抵抗侵略者，有 m̄驚死 ê 決心。加上歐美民主國家團結起來，出手相助，台灣也一定會 lú 拍 lú 勇。前總統李登輝講，如果台灣人民有75%支持獨立，台灣就獨立 à。但目前，支持台灣獨立者無超過50%。這是咱現在愛 lô-li̍k ê 目標，通過教育 kap 濟濟管道，宣揚台灣民主、自由、人權ê可貴，kap 佇中國統治之下，所 tú-tio̍h ê 慘境。
咱愛有信心，因為支持台灣 ê 國家真濟，日本攏表示：「台灣有事就是日本有事。」美國總統拜登有講，只要中國拍台灣，美國一定出兵捍衛台灣。所以台灣若受攻擊，世界民主國家，一定會親像支持烏克蘭 siang-khuán，大力支持台灣。
現在上重要 ê，是咱愛有信心，愛團結一致，大家有共同 ê 目標，向獨立建國 ê 道路邁進。天助自助者，上主必定帶領咱出埃及，建立新 ê 台灣國，完成獨立建國 ê 偉大目標。 （作者為退休牧師）
