Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◉錢信哲
Ta-lian ê png-á-chhiū,
Thǹg bē-lo̍h sim-koaⁿ-thâu ê kòa-liām,
Bî-bî-á chhoe ê sng-léng-hong,
Kiò-bē-cheng-sîn lúi-chek ê thiám-thâu,
Chhoah-lâu ê khe-chúi,
Mā sé-bē-chīn che̍k-bo̍k ê mî-áu.
Nǹg-ji̍p lo̍k-kô͘-á-moâi ê kha-ìn,
Chi̍t lō͘ kiâⁿ–lâi iû-goân chiah-nī-á tēng-táu,
Po̍h-li-si-á ê hiong-chhiû soah-lâi hiông-hiông thòaⁿ–khui.
Âng-hiā-chhù, Phêⁿ-á-chhân,
Lāu-chúi-gû, Tek-ûi-á,
A-má cha̍p-liām ê siaⁿ-kù,
Iáu-ū têng-á-kha khùn tiàm the-í téng-koân a-kong ê hêng-iáⁿ,
Bô-gî-gō͘,
Siàu-liām ê hiong-chhiû m̄ bat lî-khui,
Ta̍p-ta̍p-tih-tih, têng-têng tha̍h-tha̍h,
Su-su iū liām-liām.
