【創作天地】冷風ê數念

第1屆王育霖詩人檢察官台語詩徵文比賽得獎作品│第一名

王育霖詩人檢察官台語詩徵文比賽。

◉李寬宏

二月 ê 冷風吹散溪仔墘 ê 柳樹
生冷 ê 水透薄血液原本 ê 溫度
你 ê 雙目敢若咧向望
向望彼个看袂著 ê 未來

舊時,你徛佇冷風中
將無邊 ê 神話藏佇身軀頂 ê 檢察官服
共法律 ê 火把舉過頭殼頂,自頭到尾
火光下底,是一个閣一个起腸肚庵 ê 見笑代

烏暗中,你 ê 手將訴狀無情拆破
毋過,你 ê 眼神煞散發無仝款倔強
黑幕對面頭前降下
晴和 ê 脆雷,你猶原咧等待
日頭漸漸暗淡,冷風若像判刑
早前 ê 恬靜,已經袂閣轉來

冷風掀開魔鬼 ê 白幕
是新竹「粉蟲」ê 聳鬚面容
你手中搦著刺目 ê 長劍
蓋天蓋地 ê 黑暗向你相接跤來

你 ê 肩胛頭毋捌壓落去
雖罔失望佮寂寞予你不止仔茫然
當欲越頭離開 ê 時
踮講台頂面拍拚 ê 畫面,你雄雄想起
閣一擺,你選擇奮戰
迎接另外一个理想世界

惡魔 ê 埋伏毋捌改變
暗中 ê 刀鋩,是先進 ê 寶血
粉筆和箠仔
嘛無法度抹銷惡骨 ê 記持

彼是二月 ê 上尾一工
呼聲 hām 生狂佇街路上演
銃聲了後 ê 血紅色印記
冷風吹過 袂赴紀錄
記持就按呢生予人切斷

日頭光最後屈服踮無盡頭 ê 死寒
冷風予人放袂記春天已經到矣
暗眠摸 ê 銃口傱入去百姓 ê 窗仔門
你金金相著銃口,毋捌越頭
聽袂著厝內某囝 ê 叫喝

袂當暫停 ê 走傱,無邊 ê 數念
跤步消失佇厝內人 ê 視線
消息親像海風飄來
希望綴著海湧散去
真抑是假,已經無人知影

只賰淡水河猶原會記得冷風 ê 摧殘
會記得銃空汪汪流 ê 鮮血
會記得你猶原無法度相信 ê 雙目
袂閣驚惶 面對災厄
只賰冷風作伴
吹著河水 一冬閣一冬


註:

.透薄(thàu-po̍h):稀釋。
.生冷(chheⁿ-léng):冰冷。
.起腸肚庵(khí tn̂g-tō͘ am):中飽私囊。
.粉蟲:指王育霖作檢察官時查辦的新竹市「奶粉吞沒案」的涉案人,其中不乏新竹市長、警察署長等人。
.聳鬚(chhàng-chhiu):囂張。
.搦(la̍k):握。
.刀鋩(to-mê):刀刃。
.箠仔(chhôe-á):教鞭。
.傱(chông):跑。


延伸閱讀:王育霖詩人檢察官台語詩徵文比賽

廣告/聖經充滿我-經文填充本

我有話要說