Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
編按：
Chok-chiá sí Chú-āu 4 sè-kí tī Caesarea ê chú-kàu, i tùi-tiōng siā-hōe kong-gī, chín-chè sòng-hiong, khí-chō siu-iông-só͘ kap pīⁿ-īⁿ.
作者◉Basil of Caesarea
台譯◉Iû Nái-kî
1
Chhì-thàm ū nn̄g-chióng hêng-sek. Ū sî ēng khó͘-lān ê hêng-sek chhut-hiān, chhin-chhiūⁿ kā kim-á hiat tī hóe-lô͘, thong-kòe siū-khó͘ lâi khòaⁿ kóng sim ū sûn-chiàⁿ á-bô. Tùi tāi-pō͘-hūn ê lâng lâi kóng, hù-jū ê jîn-seng chiah-sī siōng tōa ê khó-giām. Bô-lūn sī tī khùn-kéng ê sî hō͘ lêng-hûn bián-tit choa̍t-bāng, á-sī tī hù-jū ê sî hō͘ lêng-hûn bián-tit bú-bān, chit nn̄g-chióng chhì-thàm lóng chin oh-tit bīn-tùi. Úi-tāi ê Iok-pek chiū sī tī tē-it-chióng chhì-thàm tiong-kan kian-chhî kap ló͘-le̍k ê lē. I ēng kian-tēng ê sim bīn-tùi mô͘-kúi chi̍t-poaⁿ-iūⁿ ê pō-le̍k. Te̍k-jîn ê chhek-lio̍k nā jú hiong-ok, chiū jú ē-tàng piáu-bêng Iok-pek iâⁿ-kòe chhì-thàm ê lêng-le̍k. Thâu-tú-á só͘ tha̍k hit ê hó-gia̍h-lâng ê kò͘-sū sī chhut-tī hù-jū seng-oa̍h ê chhì-thàm. I m̄-nā hó-gia̍h, koh siūⁿ beh tit-tio̍h koh khah chōe. Siōng Chú thiàⁿ sè-kan-lâng, bōe in-ūi lâng bô kám-un chiū kā i sím-phòaⁿ, hoán-tńg ke-thiⁿ koh khah chōe châi-hù lâi hō͘ i móa-chiok, hō͘ i ê lêng-hûn thang chhin-kūn jîn-kûn, koh thang oa̍h chhut bûn-bêng ê hêng-ûi.
“Ū chi̍t-ê hó-gia̍h-lâng, i ê chhân-hn̂g tōa hong-siu. I sim-lāi siūⁿ-lâi-siūⁿ-khì, kóng, ‘Góa bô-kàu só͘-chāi thang tún ngó͘-kok, taⁿ beh án-chóaⁿ?’ I chiū kóng, ‘Góa tio̍h án-ni chòe. Góa beh kā chhng-khò͘ thiah–khí-lâi koh khí khah tōa-keng.’” Ūi-siáⁿ-mi̍h chit ê bô goān-ì kap pa̍t-lâng hun-hióng hong-siu–ê, i ê tōe ōe siu-koah chōe chōe? Che hián-bêng Siōng Chú ê jím-nāi, in-ūi Siōng Chú ê liông-siān iā ōe sù hok-khì hō͘ chit khoán lâng. “I hō͘ ji̍t-thâu chhut-lâi chiò pháiⁿ-lâng kap hó-lâng, mā lo̍h-hō͘ hō͘ gī-lâng kap put-gī ê lâng.” Khak-si̍t sī án-ni, Siōng Chú ê liông-siān ē ke-thiⁿ koh khah chōe hêng-hoa̍t hō͘ pháiⁿ-lâng. Siōng Chú hō͘ tham-loân–ê só͘ chèng-choh ê tōe ū hō͘-chúi, koh ū ji̍t-thâu ke-thiⁿ un-loán hō͘ chéng-chí tōa-châng tì-kàu tōa hong-siu. Hoān-nā sī ū lī-ek ê lóng sī ùi Siōng Chú lâi: pûi ê thó͘-tōe, un-loán ê thiⁿ-khì, chéng-chí chōe chōe, tōng-bu̍t chi-kan ê ha̍p-chok, í-ki̍p chok-bu̍t hong-siu só͘ su-iàu ê it-chhè. Chóng–sī, jîn-lūi hoán-tńg ēng khó͘-to̍k, thó-ià kap pa̍t-lâng lâi-óng, í-ki̍p bô goān-ì hun-hióng lâi hôe-èng sù-hok hō͘ i ê Chú. I bōe-kì-tit ka-kī kap kî-thaⁿ ê lâng lóng ū kâng-khoán ê su-iàu, mā bô kám-kak ài chiong ka-kī ê hong-sēng pun hō͘ ū su-kiû ê lâng. I liân chiah-ê kài-bēng tō bô chun-siú: “m̄-thang bô chiàu-kò͘ sòng-hiong lâng,” “m̄-thang hō͘ lîn-bín kap sìn-sit khì-sak lí,” í-ki̍p “kap iau-gō ê lâng hun-hióng chia̍h-mi̍h.” I m̄ thiaⁿ sian-ti kap kàu-su ê khoàn-kò.
Thong-kòe put-toān lúi-chek í-keng ū ê mi̍h, i ta̍k tang ke-thiⁿ–ê put-kò sī chhun-tiông. In-ūi tham-loân, i m̄-nā bô móa-chiok tī í-keng ū ê mi̍h, iā bô in-ūi tōe ê hong-sēng lâi chek-chū sin ê mi̍h. “Góa beh án-chóaⁿ chòe?” I siūⁿ beh chai. Siáⁿ-lâng bōe ōe lîn-bín chit ê hō͘ mâ-hoân pau-ûi ê lâng? I in-ūi hù-chiok lâi thòng-khó͘, in-ūi ū hó-mi̍h lâi pi-chhám, sīm-chì in-ūi siūⁿ beh tit-tio̍h koh khah chōe hó-mi̍h tì-kàu pi-chhám. Thó͘-tōe bô tòa hō͘ i siu-ji̍p, hoán-tńg ín-khí i put-móa ê thó͘-khùi; i siu-sêng–ê m̄-sī hong-hù ê chhut-sán, sī iu-chhiû kap hoân-ló. I chhin-chhiūⁿ sàn-chhiah-lâng teh thó͘-tōa-khùi. He̍k-sī kóng, sàn-chhiah-lâng kám-kóng chiū ōe hoat-chhut hiah-nī-á pi-chhám ê kiû-kiò? “Góa beh án-chóaⁿ chòe? Beh chia̍h siáⁿ-mi̍h? Beh chhēng siáⁿ-mi̍h?” Chiah-ê mā sī pù-lâng ê hoân-ló. I ê sim hō͘ khòa-lū thun-chia̍h. Hō͘ lâng hoaⁿ-hí–ê, hoán-tńg hō͘ tham-loân ê lâng lōng-hùi tiāu. I bô in-ūi ka-kī ū hó-mi̍h lâi hoaⁿ-hí, hoán-tńg hō͘ ùi chéng-thâu-á phāng sia̍p-lāu ê châi-hù chha̍k sim-thâu. I kiaⁿ hiah-ê ùi chhng-khò͘ móa–chhut-lâi ê châi-hù ōe lâu-khì i ê ûi-chhiûⁿ gōa-bīn, piàn-chiâⁿ khiàm-khoeh–ê ê chu-goân.(Āu kî koh khan)
延伸閱讀：Beh thiah ka-kī ê chhng-khò͘
