Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◉李南衡
福伯講：「咱bat聽人講一間公司經營不善破產，你敢bat聽講一个國家破產？佇印度東南方有一个海島國家Sri Lanka，人口2100外萬，土地約台灣ê 1.8倍。舊年（2022）七月總理宣布國家『破產』。Che攏是中國一帶一路『債務陷阱外交』ê好致蔭、好牽拾。Sri Lanka前總統Mahinda講伊ê家鄉tio̍h建設一个國際級Hambantota港、kah一个國際機場。開工了後無錢bē振動，抵好2013年中國國家主席習近平喝出『中國夢』，包括『絲綢之路經濟帶』kah『21世紀海上絲綢之路』。Ùi中國港口經由南海串連Sri Lanka、印度到巴基斯坦等南亞國家，是『一帶一路』海上絲綢之路ê要道。Sri Lanka趕緊向中國銀行貸款110億美金占全國外債兩成外，中國港灣工程公司隨時入去負責建設。Sri Lanka政府無法度即時還債，2017年中國通過轉換機制kā貸款轉換作股權得tio̍h港口kah港口周圍1萬5000英畝土地，租期99年。貸款中有一大筆錢hō͘總統歪去。中國那會愛chit ê佇Sri Lanka南部，無經濟效益ê港口？目的是伊ê軍事情報戰略地位。中國攏是用chit步『債務陷阱外交』，債權換股權ê方式來得tio̍h南亞國家ê土地kah海港。」
我問講：「聽Sri Lanka國家破產，中國那會無beh減免in ê債務？」
福伯大笑：「我m̄才講中國『無hit號尻川，敢kah人食hit號瀉藥。（Bô hit-hō kha-chhng, káⁿ kah lâng chia̍h hit-hō sià-io̍h.）』瀉藥是為tio̍h清腹肚排大便ê藥物，有人食瀉藥bē堪得，才有chit句台灣俗語話。設使『一帶一路』ê國家有樣看樣攏要求減免債務，中國可能tio̍h損失幾十兆美金，中國吮人血ê計畫tio̍h去了了。中國無才調學美國當年ê『美援』tio̍h m̄好學，tòe人食瀉藥會無命。第二次世界大戰了後，美國開足濟錢援助真濟開發中kah未開發國家，beh防止共產主義thòaⁿ開。1951年開始，美國每年送台灣1億美金，hit當時新台幣40箍換美金1箍，台灣一般公教人員一個月薪水新台幣600箍。10年後，1961年才開始免利息1年貨款1億美金，第11年才開始還本金，對台灣ê經濟發展幫助chiâⁿ大。美國hō͘中國國民黨政府貪汙嚇驚tio̍h，特別佇台北設立一間民間ê『美國懷特工程顧問公司』規畫、監督『美援』ê實施kah預算。當時足注重基礎建設，包括縱貫公路、西螺大橋、德基水庫、水力發電廠等。『台灣出土跤，美國出tá-má-ka。』是當時上時行ê一句話。『美援』那像天頂lak-lo̍h-lâi來ê禮物，mā鼓勵發展新興輕工業包括合板、塑膠等，1965年設高雄加工出口區。中國想beh學美國作世界ê『大哥』，我才會笑講中國『無hit號尻川，敢kah人食hit號瀉藥。』」
