【台文世界】Beh thiah ka-kī ê chhng-khò͘(IV)

Lō͘-ka 12: 16b-21

Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型,配合Firefox瀏覽器來讀

作者◉Basil of Caesarea
台譯◉Iû Nái-kî

 6 

Sui-jiân lí sim-lāi só͘ siūⁿ–ê chí-ū ka-kī chai-iáⁿ, tān-sī lí só͘-siūⁿ–ê ōe tī thiⁿ–ni̍h siū kiám-giām. Lí ê lêng-hûn nā ū bí-tek, kiâⁿ hó-sū kap Siōng Chú tông-chāi, chiū tek-khak sī bí-hó–ê, ài ūi-tio̍h án-ni lâi hoaⁿ-hí. Lí m̄-thang kan-taⁿ khó-lū sè-sio̍k ê sū, chiong pak-tó͘ tòng-chòe sîn, sio̍k-tī jio̍k-thé, hō͘ su-io̍k chhe-khián. Tio̍h thiaⁿ Siōng Chú tùi lí kóng: ”Gōng-lâng! Kim-mî chiū beh siu-hôe lí ê sìⁿ-miā; lí só͘ chek-chū ê it-chhè beh lâu hō͘ siáⁿ-lâng?” Pí éng-oán ê hêng-hoa̍t khah hāi–ê sī lí ê gû-gōng.

Sìⁿ-miā ê lō͘-bóe, châi-chú teh siūⁿ siáⁿ? “Góa beh thiah góa ê chhng-khò͘, khí khah tōa ê.” Góa jīn-ûi bô kong-gī ê chhng-khò͘ tio̍h siū thiah-húi. Ēng ka-kī ê siang-chhiú húi-hoāi chhò-gō͘ ê kiat-kò͘. Thiah-tû tham-loân ê chhng-khò͘, phah-khui chhù-téng, chhia-tó ûi-chhiûⁿ, hō͘ hiú-nōa ê ngó͘-kok pha̍k ji̍t-thâu, hō͘ siū khún-pa̍k ê châi-hù tit-tio̍h tháu-pàng.

“Góa beh thiah góa ê chhng-khò͘, khí khah tōa ê.” Lí nā kā têng-sin khì–ê té hō͘ móa, chiap-sòa beh án-chóaⁿ chòe? Kiám boeh koh kā thiah-tû lâi khí khah tōa ê? Hàm-kó͘! Lí phah-piàⁿ khí hó liáu-āu koh thiah-tû? Lí nā siūⁿ beh ài chhng-khò͘, ōe-tàng chiong chia̍h-mi̍h khǹg tī sàn-hiong-lâng ê pak-tó͘. Ūi ka-kī chek-chū châi-pó tī thiⁿ–ni̍h, bōe hō͘ thâng kā, bōe hiú-nōa, mā bōe tio̍h-chha̍t- thau. Lí kóng, “Góa nā kā tē-jī-ê chhng-khò͘ tún hō͘ móa, chiū ōe kā ke–ê hō͘ ū su-iàu ê lâng.” Lí khak-sìn ka-kī koh ū chōe-chōe hòe-siū? Sí-bông ōe pí lí só͘ siūⁿ ê khah chá kàu. Sīm-chì che tē-jī-ê chhng-khò͘ ê iok-sok mā m̄-sī lí tī bī-lâi só͘ beh hù-chhut–ê, in-ūi che kan-taⁿ sī lí theh lâi siám-pī hiān-chāi chek-jīm ê lí-iû. Taⁿ, sī siáⁿ chó͘-tòng lí hù-chhut? Sàn-hiong-lâng kiám m̄-sī tī lí ê ba̍k-chiu-chêng? Lí ê chhng-khò͘ m̄-sī í-keng móa–chhut-lâi ah? Lí tī thiⁿ-ni̍h ê pò-siúⁿ í-keng teh tán ah! Kài-bēng kiám bô bêng? Iau-gō–ê teh boeh iau–sí, bô saⁿ thang chhēng ê teh boeh kôaⁿ–sí, khiàm-chè–ê teh boeh bōe chhoán-khùi, lí iáu boeh tán-kàu bîn-á-chài? Tio̍h thiaⁿ Só͘-lô-bûn ê ōe, “m̄-thang tùi lí ê chhù-piⁿ kóng, ‘Lí tńg–khì, bîn-á-chài koh lâi, góa chiah hō͘ lí.’” Lí m̄-chai bîn-á-chài ōe hoat-seng siáⁿ tāi.

Tio̍h kám-siā hit ê sù-hok hō͘ lí ê, lí m̄-bián tī pat-lâng ê mn̂g-kha-kháu kap lâng pun, lí eng-kai ūi-tio̍h ū lâng phah lí ê mn̂g lâi khoài-lo̍k. Tān-sī chit-ḿa lí ê ba̍k-sîn siám-bih, lú kiâⁿ lú kín, chhìn-chhái ngāu-ngāu-liām ìn-ōe, kiaⁿ pat-lâng ngiáu lí chhiú–ni̍h ê gîn-á. Lí kan-taⁿ ē-hiáu kóng: “Góa bô mi̍h thang hō͘ pat-lâng, góa chin sàn-chhiah.” Lí khak-si̍t sī sàn-chhiah, in-ūi sit-khì só͘-ū ê liông-siān: bô thiàⁿ, bô jîn-ài, bô sìn-khò Siōng Chú, m̄a khiàm-khoeh tùi éng-oa̍h ê ǹg-bāng. Tio̍h kap lí ê hiaⁿ-tī-chí-mōe hun-hióng bí-niû. Kin-á-ji̍t pun hō͘ ū su-iàu–ê ê mi̍h, bîn-á-chài chiū ōe hiú-nōa. Khak-si̍t che sī siōng hāi ê tham-loân: sīm-chì bô ài kap pat-lâng hun-hióng ōe hiú-nōa ê mi̍h. (Āu kî koh khan)

延伸閱讀:Beh thiah ka-kī ê chhng-khò͘

廣告/聖經充滿我-經文填充本