◉林朝成
台灣基督長老教會佇2009年出版新《聖詩》，將1964年出版 ê 聖詩做一番ê 修改。首先，加添世界各國 ê 聖詩，互新《聖詩》成做普世性 ê 聖詩，信徒會當唱出逐 ê 國家民族 ê 聖詩，這是新《聖詩》一 ê 特色；其次，新《聖詩》ê 啟應文配合《聖經─現代台語譯本》，使用新譯 ê 現代台語，無用過去使用 ê《巴克禮台語譯本聖經》。
新譯ê聖經其中一個特色就是將「耶和華」改作「上主」。原來以色列人讀希伯來文聖經，當𪜶讀著YHWH這字，𪜶毋是讀Yahweh，是讀Adonai（上主），因為直接讀出上帝 ê 名，是對上帝不敬。而且咱閣將上帝 ê 名讀毋著，因為希伯來文聖經 ê Yahweh，母音是注Adonai的母音，但是聖經學者以為母音是注YHWH，所以讀起來變做Jehovah，就是耶和華。
事實上，上帝ê名ê正確讀音是Yahweh，會當翻做「耶威」。所以現在新譯 ê 台語聖經及新《聖詩》攏將「耶和華」改做「上主」。譬如201首，原來是〈主耶和華是我牧者〉，改作〈上主作我至好牧者〉。包括啟應文iah攏改作上主。唯一沒有改著 ê 是頭前 ê〈上帝十條誡〉，猶原使用「耶和華」，希望再版會通改過來，互全部新《聖詩》攏統一用「上主」。
（作者為退休牧師）
