◎陳星旭
1988年，加拿大衝突研究學院（CICR）tī加拿大首都Ottawa的St. Paul University 設立，是全世界出名ê衝突研究機構之一。加拿大聯邦政府tī 2003年立法通過《公共事務現代化法案》，則採用in ê 研究方法及成果，訓練中階以上主管。早時Rwanda、Bosnia 兩國來加留學生也先後回國設立研究中心，對該地區 ê 內部衝突 ê 非暴力處理，提供真有效 ê工具。
全世界100外个國家攏有這个研究學院 ê 結業生。2005年由陳校賢博士，經過2年 ê 修習研究，取得該中心「學院院士兼任高級講師」ê資格，將這套處理衝突 ê 工具，Third Party Neutral（TPN，中性第三者）引進到台灣，tī長榮大學成立「長榮大學衝突研究中心」，後來台灣基督長老教會（PCT）也參與合作計畫及執行，在台灣訓練近千位俱備有專業處理衝突 ê 牧者及社運人士。2013年4月6日，CICR beh 慶祝25週年慶，特別邀請PCT及長榮大學派代表參加，前國防部長蔡明憲教授受PCT ê 委託前來參加。
4月初6早起，哲夫兄開車來阮兜接明憲兄夫婦kap我，五个人坐一台車向Ottawa出發。到會場 tō kap大家認-bat請安。遇著幾位bat去台灣做訓練講師 ê，看著阮到，真歡喜，真親切過來拍招呼。Ottawa也有10幾位鄉親來支持，參加這个盛會。
節目進行ê 中間，有放電影短片，介紹CICR ê 歷史，幾偌擺有看著校賢兄受訪問kap tī台灣受訓學員認真討論 ê 鏡頭，這mā是咱國民外交 ê 戰場。彼暗 ê 主題演講者是加拿大影展得獎影片《Rebelle》 ê 導演 Kim Nguyen，描寫非洲戰亂時，一位查某gín-á 被迫去刨人 ê 殘忍故事，Kim感性teh 呼籲非暴力kap和平。
Mr. Brian Strom（Executive Director, CICR）解釋董事會決定beh頒發25週年特別激勵獎， in 有討論幾項選擇標準，伊講有一个人，tī大家討論中間攏無異議kā伊khǹg tī 上頂高，伊 tō 是台灣來 ê Dr. Steve Chen 。一時，全體來賓攏khiā起來，向阮這桌 ê 校賢兄拍噗-á恭喜。校賢兄感覺真意外，歹勢歹勢頭lê-lê 出去領獎。這陣，阮才了解，是按怎校賢兄早前teh問節目ê程序問題時，Brian 攏無kā回答。
和伊做伙教訓練ê 研究學院同事，koh 阮和伊做伙拍拚 ê 同工，攏知影校賢兄這10幾年來 ê 認真、奉獻。伊m̄-nā逐冬將tī加拿大所領退休金 ê 真大部分捐hō͘ CICR，用來幫贊喪鄉國家 ê 學員有法度來受訓，伊tī長榮大學做教授 ê 薪水mā一半捐hō͘ 台灣 ê 長榮大學衝突研究中心做經費（一半捐hō͘ 台灣 ê 公益團體），伊家己三頓kap 學生gín-á 排隊食飯，出入mā靠一台舊腳踏車來來去去。
Brian感謝PCT長期對普世價值 ê 關懷kap堅持，並且對CICR所做 ê 有認同kap支持。伊邀請PCT ê 代表明憲兄上台致詞。短短2～3分鐘，伊講出：「1.PCT對CICR提供台灣人民這套好ê工具，hō͘咱tī奮鬥 ê 路站有好 ê 扶持；2.台灣人民感謝加拿大人民過去ê幫贊kap支持；3.希望CICR有法度設法kā這套工具引入去北朝鮮，hō͘ in 知影除了武力，猶有較好ê方法會tàng處理衝突。」大家聽了，攏真同意。
（作者為加拿大台灣人公共事務會會長）
