◎Koeh Iàn-lîm
1月16、17日，教育部假影借用「課綱微調」名義佇高師大、逢甲大學以及國教院舉辦公聽會，宣布beh對高中歷史、地理等課本有關台灣歷史部分內容kap台灣史觀烏龍seh桌，koh表示為符合憲法將原本課綱「中國」一詞「違調」做「中國大陸」。筆者khiā佇台灣主體化教育立場，提出以下訴求：
1.教育部應撤換課綱總召王曉波教授kap兩岸統合協會委員（謝大寧）：課綱小組成員應該有台灣心，王曉波教授kap兩岸統合協會成員（謝大寧kap進前ê張亞中）in政治意識凌駕台灣意識，beh將台灣子弟中民化，所提出之修正用語乃是khiā佇中國立場，失去學者風範，教育部應盡速撤換，無者教育部官員有賣國、瀆職ê嫌疑。
2.正名「中國」：中國ê正式名稱，現階段siōng適當名稱是中國毋是中國大陸，koh再講若照王曉波教授「憲法」所言，中華民國憲法ê訂定過程並無照民主程序由台灣人民公投決定，所以「中國大陸」iah是「大陸」無精準用詞實在不適宜用佇教科書。
3.歷史課綱應納入〈舊金山和約〉：高一台灣史單元四「中華民國時期：當代台灣」之說明刁工忽略戰後1951年908〈舊金山和約〉有關台灣主權內容，beh培養高中學生國際觀，〈舊金山和約〉thang講是最佳教材之一，教師可透過國際法引導學生思考台灣主權。
4.加開公聽會，聽趁民意：新正年頭，教育部學前署chiah舉辦三場課綱公聽會，無佇東部召開公聽會，徵詢東部老師意見，無啥公平。而且根據現時高中課綱所編撰ê歷史課本，2011年5月27日chiah tú-tú修正發布，2012年8月起高中chiah開始使用，正式實施不過一年半，教育部狂beh「違調」課綱，手段粗魯mài講，beh「危調」ê部分內容mā bē堪得專家學者檢驗，呼籲教育部毋thang橫柴入灶，應該koh加開10場公聽會，徵詢外界意見。
課綱是「危調」、「違調」iah是「微調」？咱ài要求教育部審重看待課綱，千萬毋thang藉修改課綱偷渡中民化教材kap用語。
（作者為台灣教師聯盟秘書長）
