◎陳豐惠
最近「吾思華，不思台」ê教育部決議12年國教課綱「國中本土語言維持選修」，hō͘台灣母語復興運動者ê「國小本土語言必修一節延伸到中學」ê卑微寄望破碎，有志大家感覺真鬱卒；幾工前koh有立委「m̄捌字兼無衛生」公開講tī學校教母語會「破壞民族情感」，實在hō͘人懷疑伊活tī佗一世紀？
聯合國教科文組織m̄但一擺呼籲應該tī正式教育實施多語（家己ê族語以外，嘛需要學習其他族群ê族語至少一種kap外國語言），多語會幫贊智力開發，提升創造力，甚至tī1999年koh訂2月21做「世界母語日」，呼籲各族群注重kap傳承家己ê母語，千萬m̄-thang hō͘族語滅絕，造成世界文化資產ê喪失。
咱長老教會總會台灣族群母語推行委員會10外冬來為欲復興各族群母語，除了舉辦各種母語活動、發行母語出版品以外，koh定期舉辦「白話字中級檢定」（檢定書寫能力），就是認定白話字是族語釘根ê起步，雖罔提著檢定證書「無趁湯，無趁粒」，無啥物「利頭」，但是透過檢定，咱thang有學習、研討ê過程，咱thang較認捌咱ê族語kap文化，加強咱ê自信kap主體性；上重要ê是，咱thang替世界文明保存文化資產，咱確信：台灣各族群母語是上主賞賜ê寶貝！
今年度白話字中級檢定，總會招李江却台語文教基金會、台灣羅馬字協會、台灣南社、台中大千電台協辦，按算11月9日禮拜日下晡一點tī台北、台中、高雄舉行。若有教會兄姊超過5位以上欲集體報名，嘛thang特別tī教會設考場。2015年起，會增加定期ê白話字中級檢定，koh有beh加舉辦白話字初級檢定，希望鼓舞較濟兄姊投入語言文化復興事工。關係報名詳細狀況會使電話詢問：0930-067-228陳小姐iah是02-2311-2199、bongpo1996@gmail.com王小姐，網站：tmt.pct.org.tw點「最新消息」、www.tgb.org.tw。
（作者為馬偕醫學院兼任台語講師，長老教會總會台灣族群母語推行委員會專員）
