【台文世界】Chhu-kiok(II)

Image by rawpixel.com on Freepik.

Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型,配合Firefox瀏覽器來讀

作者◉Hans Christian Andersen
台譯◉李孟真

Sòa–lo̍h-lâi in nn̄g lâng gia̍h thô͘-chhiah tāng-chhiú kā chhu-kiok khiā-khí ê chháu-á-thô͘ chhiat sì-kak–khí-lâi.

“Chit lúi hoe ka bán–khí-lâi.” lēng-gōa chi̍t ê gín-á kóng. Chhu-kiok kiaⁿ kah phi̍h-phi̍h-chhoah, ùi thô͘–ni̍h hông bán–khí-lâi tō bô-miā–ah, m̄-koh, chhu-kiok chóaⁿ-iūⁿ to siūⁿ-beh oa̍h–lo̍h-lâi. I siūⁿ-beh hām chháu-á chò-hóe ji̍p-khì hit ê chiáu-lang-á lāi, chún-kóng kan-na chi̍t-phí-á, i iā siūⁿ-beh kā pòaⁿ-thiⁿ-á an-ùi–chi̍t-ê.

“Án-ne m̄ tō hó–ah! Che hoe khui kah chiâⁿ súi neh!” Chìn-chêng hit ê cha-po͘ gín-á kóng. Chiū án-ne, chhu-kiok hām chháu-á chò-hóe hông khǹg ji̍p-khì chiáu-lang-á lāi.

Khó-liân–ah! Pòaⁿ-thiⁿ-á choa̍t-bōng koh pi-siong, tī chiáu-lang-á lāi poe-lâi poe-khì, siūⁿ-beh tui-kiû sit–khì ê chū-iû. M̄-koh, i ê ú-mô͘ sûi pōng–tio̍h thih-sòaⁿ-bāng, chi̍t pái koh chi̍t pái, chi̍t pái koh chi̍t-pái ùi téng-bīn poa̍h–lo̍h-lâi.

“Ah! Bô-chúi! Chhùi-ta kah kiông-beh to̍h-hóe.” Góa ê thé-lāi chhan-chhiūⁿ ū hóe kap peng teh chhia-piàⁿ! Góa beh chúi! Siūⁿ-beh khì hit tiâu chhan-chhan teh lâu ê khe-chúi hia! Góa tī chit ê lang-á lāi, lī ji̍t-thâu ê kng hn̄g-hn̄g, hām chheⁿ-chhùi ê chhiū-nâ kap be̍h-á-hn̂g saⁿ-lî, hām thian-sîn só͘ chhòng-chō só͘-ū bí-biāu ê it-chhè lâi hun-khui. Kám-kóng góa beh sí tī chia ah……!”

Pòaⁿ-thiⁿ-á ná kóng ná kā sè-sè ê chhùi-chiam chhun ji̍p-khì liâng-liâng ê chháu-á lāi, siūⁿ-beh tit-tio̍h chi̍t-tiám-á khùi-la̍t. Hit-sî pòaⁿ-thiⁿ-á hoat-kak tio̍h chhu-kiok, i sui-bóng teh chhoán-tōa-khùi, chóng–sī i kā chhu-kiok khin-khin-á chim–chi̍t-ê, kóng: “Khó-liân ê chhu-kiok kun! Lâng kā lí kap chit phìⁿ chheⁿ-chháu hē tòa chia, kám-sī kā chit phìⁿ chháu-á tòng-chò chheⁿ-chhùi ê chhiū-nâ? Kā lí chi̍t phìⁿ chi̍t phìⁿ ê hoe-ia̍p tòng-chòe pêⁿ-iûⁿ khui-hoe ê hoe-châng?”

Chhu-kiok siūⁿ-beh chò kóa tāi-chì kā pòaⁿ-thiⁿ-á tàu-saⁿ-kāng, ka an-ùi. M̄-koh, i siáⁿ-mi̍h to bô-hoat-tō͘ chò. I piàⁿ-miā ùi i chheng-pe̍h ê hoe-ia̍p chhèng-chhut phang-bī. He phang-bī phēng it-poaⁿ chhu-kiok iáu-khah phang.

Àm-mî–ah, bô jīm-hô chi̍t ê lâng sàng chúi lâi chiáu-lang-á hia. Khó-liân ê sè-chiah chiáu-á, thián-khui si̍t-kó͘ ia̍t–leh ia̍t–leh, i ai-bêng. Iām-lè-lè ê chhùi-ta kap pi-siong ê sim-chiâⁿ, bô-gōa-kú i tō bô-hoat-tō͘ chhut-siaⁿ, khùi-la̍t choân-sit ê pòaⁿ-thiⁿ-á, chiong i sè-sè ê thâu-khak the tòa chhu-kiok ê hoe bīn-téng, i bô-hoat-tō͘ koh-chài poe, iā bô-hoat-tō͘ koh-chài chhiùⁿ-koa.

Keh-kang chái-khí, nn̄g ê cha-po͘ gín-á tńg–lâi. In khòaⁿ tio̍h pòaⁿ-thiⁿ-á khiau–khì, in háu kah chin tōa-siaⁿ, háu kah ba̍k-sái sì-lâm-sûi. In kā thô͘ ó͘-khang chiong pòaⁿ-thiⁿ-á siu-bâi.

Sí–khì ê pòaⁿ-thiⁿ-á ū jiû-nńg ê pò͘ ka pau–leh, hē tòa sè kha a̍p-á lāi-té, chàm-jiân chhiūⁿ kok-ông kâng-khoán hông an-chòng. Pòaⁿ-thiⁿ-á ê bōng lāi-té, chng-thāⁿ chin chē bí-lē ê hoe-lúi… Khó-liân ê pòaⁿ-thiⁿ-á! Oa̍h–leh chhiùⁿ-koa ê sî hông pàng bē-kì–tit, pàng i teh kan-khó͘ siong-sim, tán i sí liáu-āu, chiah lâi ūi i lâu-ba̍k-sái, thè i chng-thāⁿ hoe-lúi, he kàu-té ē thang piàn-chó siáⁿ-mi̍h……?

Sè-sè ê chhu-kiok hām chháu-á tâng-chê hông tàn tī lō͘-piⁿ, chiū án-ne, i lian–khì-ah. Chit lúi chhu-kiok, pí jīm-hô chi̍t ê lâng koh-khah chhim-chhim su-liām pòaⁿ-thiⁿ-á, siūⁿ-beh ka an-ùi, i ê sim iû-oân teh su-liām pòaⁿ-thiⁿ-á. (choân-bûn kiat-sok)

廣告/2023布聖誕樹

我有話要說