◎Gô͘ Jîn-sek
台南神學院榮譽教授，詩歌〈台灣翠青〉作詞者，鄭兒玉牧師（1922～2014年）頂禮拜下午tī台南新樓病院過身。〈台灣翠青〉除了「有世界觀」（International Poetry Contest評語），tī描寫台灣ê地理、歷史、特色以及理想（共和國憲法、族群平等相協助），成做地球村一分子ê責任（人類文化世界和平）各方面攏有真周全ê意義。
真chē人認識chit位長者是因為伊四界奔波ê「母語運動」kap tī神學院「台語文化教室」ê教學，或是關懷林家血案而成立ê義光教會。實際上，1947年由日本學成歸國而大難不死ê鄭牧師，一生tō親像提摩太後書4章7節所講：「我已經爭戰好ê爭戰，已經盡跑走ê路站，已經守所信ê道理。」
伊關懷勞工、漁農民，tī台南神學院任教期間，1967創設基督教社會互談會（Christian Academy），1969首創「生命線」（高雄）。伊講出台灣人出頭天ê心聲，1971 tī尼克森總統訪問北京chìn前起稿由長老教會發表〈國是的聲明與建議〉，1977 koh為〈人權宣言〉「促請政府採取有效措施，使台灣成為一個新而獨立的國家」擬底稿。伊安慰、鼓勵、支援被迫害者，強調土地kap語言是上帝所賞賜，研議「台灣基督長老教會信仰告白」（1985年），kap「台灣羅馬字協會」組織ê初稿。講未盡ê懷思kan-ta以伊所寫ê詩來記念。
（地理）太平洋西南海邊，（環境）美麗島台灣翠青。
（歷史）早前受外邦統治，（建國）建國今在出頭天。
（憲法）共和國憲法的基礎，（國民）四族群平等相協助。
（國際）人類文化世界和平，（角色）國民向前貢獻才能。
第二節是教會吟ê詩。
（創造）最源頭上帝創造，（麗島）美麗島台灣最好。
（子民）賞賜給祖先居起，（建國）建國今上主攝理。
（基督）主基督國家的君王，（寄望）理想邦目標的寄望。
（建設）咱要建設仁愛公義，（如天）祖國滿地親像在天。
（作者為台南神學院音樂系老師）
