◎Lîm Chùn-io̍k
Tú收tio̍h牧谷基督長老教會楊子清先生ê e-mail：台灣國寶──音樂大師蕭泰然教授tī 2月24日洛杉磯時間上午8點15分息勞歸天。我感覺非常m̄ 甘！痛心失去一生為台灣phah拚ê台灣國寶！蕭泰然教授koh是我ê至好朋友！
回憶起來，kah蕭教授第一pái見面是tī台灣解嚴了後，蕭教授回國ê音樂會結束ê時，我beh載陳隆先生轉去，有機會mā 載tio̍h蕭教授，這是何等ê榮幸！阮兩人「一見如故」to̍h談kah真歡喜。
Hit時，我tú收tio̍h文建會ê台幣10萬補助金，teh beh出版《讓音樂燃亮生命》（視障勵志文學，1997年5月出版）；我tn̄g-tio̍h好機會，to̍h開嘴邀請蕭教授來寫chit本冊ê序，伊一聲to̍h答應，我講：感謝主！o-ló主！
續落來，我若回台lóng chhōe機會kah蕭教授做伙，伊mā真關心我hit時tī雙連教會teh推動ê盲人事工。我翻譯《新世紀之聲──安德列‧波伽利》（遠流出版社2001年出版）ê時，邀請蕭教授寫推薦序，伊mā是一聲to̍h答應，增加chit本冊出版ê光彩。
後來有一工，我接tio̍h蕭教授tùi洛杉磯敲來ê電話，伊講伊最近有創作一個曲，hit塊曲真適合安德列‧波伽利ê聲來唱，看我有法度kā 伊ê歌譜轉交hō͘ 安德列‧波伽利無。我收tio̍h蕭教授ê歌譜了後，就phah拚連絡原文出版社kah作者，結果lóng無收tio̍h回覆，最後只好kā歌譜寄還蕭教授。這是我siōng大ê遺憾，蕭教授為我ê兩本冊寫序，我連一項thang kā伊報答ê都無。
蕭教授有為鄭兒玉牧師ê〈台灣翠青〉寫曲，in兩人是「相疼相惜」ê好兄弟。2007年6月，蕭教授身體koh再變bái，鄭牧師叫我回美順續去洛杉磯探訪蕭教授，我當然「義不容辭」。蕭教授雖然真衰弱，伊mā是真歡喜接受我ê採訪錄影上網YouTube，題目「蕭泰然教授平安：Peace to Prof. Tyren Siau」，到taⁿ有二千gōa人點閱。
每pái kah蕭教授見面，伊lóng有送我伊新出版ê CD，hō͘ 我時常ē-tàng聆聽蕭教授關心台灣故鄉kah基督教信仰ê作品，鼓舞我ê心koh khah疼台灣，koh khah疼基督。
我真kah意蕭教授ê主日崇拜奉獻詩：「Chit時阮到祢聖殿，kám thang白白受恩典；雖然報答極膚淺，求祢鑒納阮所獻。」我tī 雙連教會第一pái tī禮拜中唱chit條新ê奉獻詩，真受感動。Tńg來到波士頓，就介紹hō͘ 波士頓台灣基督教會kah大波士頓台灣長老教會，大家lóng真歡喜tī禮拜中換唱chit條新ê奉獻詩。Taⁿ tī主日崇拜中，ē-tàng唱chit條奉獻詩，來數念我所敬疼ê蕭泰然教授，thang得tio̍h信仰ê鼓舞。蕭教授，我感謝你！
願蕭泰然教授soah伊tī世間ê工，ē-tàng放心tńg伊ê祖家，安息主懷！
（作者為全民台語聖經發起人）
