◎Koeh Iàn-lîm
今年6月佇關廟新豐教會做主日禮拜時，無意中佇公佈欄看著台南中會欲舉辦台語講聖經故事聯誼賽簡章，tú-á-hó阮查某囝亮祈對台語聖經故事有興趣，徵求伊ê意見後，真歡喜伊欲參加比賽。續落來針對聖經故事內容，我手頭有一本華文版本聖經故事，先予伊揀，揀了後我chiah kā故事內容翻做台文。翻譯過程中，恐驚內容有錯誤，koh上林俊育長老所設ê「台語信望愛」網站參考線頂台語聖經。
南中台語講聖經故事聯誼賽比賽日期是7月23，地點是歸仁教會，參加比賽ê人並無濟，心內小可失望，因為主辦單位為著欲鼓舞參賽者，有設參加獎兩百kho͘，國中組因為報名人數不足，所以國中組取消比賽。雖然如此，各參賽者非常認真準備，並無因為報名人數少to馬馬虎虎。
佇準備比賽過程中，有時會要求阮查某囝亮祈練習，因為發音無標準，kā「參賽者」講做「摻屎食」，聽著ê人哈哈大笑，我心內感覺雖然好笑，卻有淡泊仔稀微，因為台語是咱ê母語，因為台語無輪轉鬧出來ê笑詼代會傷害著自尊心，咱應當愛教育子弟正確、標準化ê台語，亮祈同意我ê觀點，我真歡喜亮祈同意我ê觀點。阮外甥蔡睿芳聽亮祈練習時，第四台電影台當teh poaⁿ一齣2012年科幻電影《超級戰艦》，伊表示電影內底有船艦號名做「參孫艦」。
「哇！美國人竟然kā聖經人物參孫號做軍艦名稱，實在真猛！」到底現實生活中美國是毋是有參孫艦，我並無清楚，但是透過翻寫台語聖經故事演講稿，予我有機會深度認識參孫，che對我來講是真好ê主日學獎品。
目前市面上適合小朋友讀ê聖經故事書面版本大部分是華文版，台語版本真罕得看，這回比賽小朋友準備ê故事台語文真順，建議主辦單位主動向參賽者抑是指導老師徵稿，收集好ê講稿，整理做書面冊本，來年比賽送予參賽者，應當會當減輕指導老師賽前準備事工，提升選手參賽意願。
若錯過7月23日ê比賽無要緊，台南中會按算10月22欲佇安南教會舉辦第二小區ê台語講聖經故事比賽，希望主日學老師替學生報名，提升學生講台語能力，增加學生讀經興趣，詳細報名資訊可連絡台南永福教會王受祿牧師。
（作者為竹中山腳教會會友）
