◎張宗隆
讀著張正雄先生的文章，感覺真歡喜；知影有bē少人認真teh讀《新約聖經附詩篇箴言》現代台語譯本（以下簡稱「此個譯本」抑是「本譯本」）。真向望張先生以及真多關心聖經台語譯本的兄姊）會當繼續針對此個譯本提出寶貴的意見，通互此個譯本koh-khah好。
下面就針對張先生的意見提出回應：
代先欲說多謝。A-mô͘-sū, Má-tàn, Se-pí-thài等等諸個專用名詞的漢字，阮會koh整理。不過，有一寡大家已經慣勢使用中文聖經的專有名詞，就採用中文的寫法。親像：保留「大衛」，毋拘猶原是「衛」ōe兵，防「衛」ūi；保留「安息日」，毋拘“hioh”-khùn, an-“hioh”猶原寫「歇」。
2.息：休「息」、利「息」讀做sek；消「息」、信「息」讀做sit。
3.筆者佇《台灣教會公報》3365期無寫巴克禮譯本「是為著『尊重少數，珍惜少數』」，mā無暗示講伊有此款翻譯原則。筆者是講，本譯本佇台灣話的採用有此個原則；特別台灣佇此款不漳不泉、亦漳亦泉的情形，已經真歹講用叨一個音腔上正確、上適當。
本翻譯小組佇音腔的採用，既然採取「尊重少數、珍惜少數」的原則，音腔的「強勢」、「弱勢」就毋是優先的考慮啦。筆者koh有講：「講台語偏漳州音的讀者或會對本譯本感到不習慣，但盼望能接納甚至認同本小組對音腔所採取的立場，和所決定的翻譯原則。」
4.佇台灣話的發音及漢字的使用，阮認為，台灣話已經有一寡話及中國的廈門話抑是閩南話無像款。漏「洩」祕密，台灣人較多是講sia̍p（《台灣閩南語辭典》）；若講lāu-“siat”pì-bi̍t，聽著的人至少著佇頭殼koh se̍h chi̍t lìn。雖然猶有人講「半身不隨」，無拘較多人講「半身不遂」（poàn-sin put-sūi）。「珍」珠，mā會當讀做chin（《甘為霖台語字典》、《李氏台語辭典》、《台灣閩南語辭典》）。
咱的台灣話已經有咱的主體性，毋免逐字逐句先想中國的廈門話是án-chóaⁿ講，抑是著照北京語（普通話）抑是中文án-chóaⁿ講才正確；相對來講，《閩南方言大辭典》《台日大辭典》對現在的台灣人的規範力mā無hiah大啦。這毋是否認中國廈門話／音的發音及古早字，不過真正著看重咱台灣話佇華語（毋是乾單廈門話／音）世界的主體性。 （作者為總會聖經現代台語譯本翻譯審議小組召集人）
