◎林怡娟
彼此暝，地大震動，搖醒入眠的夢，
牆倒！櫃倒！天板變做地！厝倒啦！
哀叫的聲傳遍地，叫天天無應、叫地地無應。
寒冷的烏暗暝，人欲去叨位閃避？
瞬間，親情相擁、愛情相擁，
做伙行入無聲無勢的世界。
地震啊！無情的物！
一個事前的通知嘛攏無，
你嘛互阮佇除夕進前，通及厝裡的人團圓。
地震啊！無情的物！
你嘛互阮及阮所疼的人通擁緊緊。
地震啊！無情的物！
你嘛互阮有時間通對阮所疼的人，講一聲：「我愛你！」
目屎流！心憂悶！身艱苦！腳跪地！
我的子啊！你佇叨落？
我的阿爸阿母啊！恁佇叨落？
我的阿兄阿姊小弟小妹啊！恁佇叨落？
咱不是才做伙吃飯講話嗎？
今，恁佇叨落啊？
一日過一日，等待閣等待，
我心著急、痛疼、也險險失望，
總是，我猶原相信，佇天光的時，我可以看到你，
向望看到你對石頭堆行出來，
向望看到你的身，互我通看你最後一面。
（作者為彰化中會北斗教會牧師）
