【台文世界】Lāu-lâng ê chiok-hok

Image by rawpixel.com on Freepik.

Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型,配合Firefox瀏覽器來讀

◎Tih-tih Hû

Goán lāu-pē chi̍t chhut-sì to̍h m̄-bat khòaⁿ-kè in lāu-pē, nā-sī in lāu-pē ê tāi-chì lóng sī in tōa-hiaⁿ Gio̍k-si-a kā kóng–ê. Goán a-kong sī Pak-káng lâng, in tau ê ban-á-kiáⁿ, tī bóe-á ū pun tio̍h saⁿ keng chhù, Ji̍t-pún chèng-hú hoa̍t hō͘ i chi̍t ki A-phiàn-hun pâi ka-ná chiok hong-kong, sū-si̍t sī in-ūi án-ne i khah bōe khì chia̍h A-phiàn. I chá-chá to̍h kòe-sin. I chhōa nn̄g-ê bó͘, goán lāu-pē sī jī-pâng siⁿ–ê. Goán a-má kè lâi N̂g–ka sī tùi Sin-Káng chē kiō lâi-kàu Pak-Káng. I ê kha ū Chheng-Kok lú-chú ê kì-hō, kha ta̍h saⁿ chhùn kim-liân. Goán lāu-bú kā góa kóng: “Lín a-má ê pa̍k-kha-pò͘ ū gōa-chhàu lí kám chai? Kha-tóe koh ē seⁿ-thâng. Góa teh ioh, i nā bô pa̍k kun-á bô chhēng-ôe, eng-kai to̍h bô-hoat-tō͘ kiâⁿ-lō͘.”

Goán pâ sī ban-á-kiáⁿ. Ū chi̍t kang i tùi gōa-káu tò–lâi, khòaⁿ tio̍h in lāu-bú teh lâu-phīⁿ, to̍h cháu lâi chàu-kha kā goán lāu-bú kóng: “Goán lāu-bú teh lâu-phīⁿ, lí sī án-chóaⁿ m̄-bián hiàⁿ-saⁿ hō͘ i chhēng?” I to̍h ēng chhiú siàn goán lāu-bú, goán lāu-bú mā bô teh lún–i, bē kham tit khì, to̍h chhiú gia̍h giap tô͘-thòaⁿ ê hóe-khîⁿ, tùi i ê kha-phīⁿ-liâm ka siah tò-tńg–khì, kóaⁿ-kín bih ji̍p khì goán a-má ê pâng-keng, kā mn̂g chhòaⁿ– khí-lâi, goán pâ ê kha pái–leh pái–leh kóng, lí kā góa chhut-lâi, nā-bô, góa kā mn̂g chàm-phòa.

Góa thiaⁿ kah chia ke̍k chhiò-siaⁿ, goán lāu-bú kóng mài-chhiò, lín tōa-hiaⁿ hit-sî í-keng saⁿ-kó͘-gōa goe̍h, hit-kang sí tiàm pak-tó͘ lāi. Gún a-má tiòng-hong nn̄g-kái lóng bô sí, jî-chhiáⁿ koh ē chia̍h-pn̄g, thoa-bôa chhit tang, chit tōaⁿ sî-kan put-koán sī se thâu-chang, chéng-lí seng-khu, chhī-pn̄g, lóng-sī goán lāu-bú ê khang-khè. Ū chi̍t kang siăn-sé lâi chhù–ni̍h, kā chhù ê lâng kóng: “Lín iōng ti-ka, ló͘-nn̄g hō͘ chia̍h khah hó leh, án-ne khah kín sí, lín khah khùi-oa̍h.” Gún a-má i chin ti-chiok, in-ūi i ū chit ê hó sin-pū tī i sin-khu-piⁿ kā chiàu-kò͘, kàu i beh kòe-sin chìn-chêng bat tùi gún lāu-bú kóng: Góa sí liáu-āu ē pó-pì lín ū chi̍t óaⁿ thang-chia̍h.

廣告/美好腳蹤368認購

我有話要說