Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎Lōa Phek-chhong
Góa kok-tiong it-nî ê sî, tāi-iok sī cha̍p-saⁿ hòe. Hit-chūn ha̍k-hāu tú khai-sí teh kà Eng-gí. Ū chi̍t pái, tōa-lâng bô-êng, góa tio̍h ài kò͘ kám-á-tiàm. Hit-sî, hut-jiân ji̍p-lâi chi̍t ê a-tok-á lâng-kheh. Tī hit ê nî-tāi, goán chin chió khòaⁿ tio̍h oa̍h-thiàu-thiàu ê gōa-kok-lâng, Tōa-pō͘-hūn kan-ta tī tiān-sī tiān-iáⁿ khòaⁿ–tio̍h.
Chit-má hiông-hiông khòaⁿ tio̍h chi̍t ê a-tok-á ji̍p-lâi, i ê thâu-mo͘ kim-kim, ba̍k-chiu lô-lô, siⁿ chòe chiâⁿ lò-kha. Góa tō khai-sí kín-tiuⁿ, sim-chōng phi̍t-phok-chháiⁿ, kín-tiuⁿ kah lâu-chhìn-kōaⁿ, si̍t-chāi m̄ chai beh án-chóaⁿ.
Sòah-loeh, góa khòaⁿ i ê ba̍k-chiu kim-kim leh siòng bí-lôa té ê ah-nn̄g. Hit-sî góa mā ū tām-po̍h-á khí-kiaⁿ, in-ūi góa kan-ta o̍h ē-hiáu kóng ke-nn̄g ê Eng-gí, si̍t-chāi siūⁿ bô ah-nn̄g ê Eng-gí beh án-chóaⁿ kóng.
Góa ê thâu-náu kek kah tōa-lia̍p-kōaⁿ sòe-lia̍p-kōaⁿ ê sî, hit ê a-tok-á hiông-hiông làu chi̍t kù, “Ah-nn̄g chi̍t-kin jōa-chōe chîⁿ? ”
Hit-sî góa kui-ê lâng lóng gông khì. “Siáⁿ-mi̍h? Chit ê a-tok-á ē-hiáu kóng Tâi-gí ! ”
Che mā sī góa thâu-chi̍t-pái tit-kiù ê keng-giām. Kóng hō͘ ta̍k-ke chhiò.
