◎蘭慈慧
全能的天父上帝感謝祢，施恩賜福台灣此塊島嶼，佇二千多年前耶穌基督真理的信仰福音就傳到全世界各角落的所在。從初代教會的建立，到佇宣教師來台灣藉著醫療做宣教福音的工作，使台灣的百姓以及台灣基督長老教會得著福音的福氣。信仰的前輩先人𪜶也持守基督信仰的精神是值得阮來學習，成為阮信仰的準繩。
今仔日阮眾大家聚集做伙要開69屆總會通常議會，時代在改變，人類歷史變遷，總是上帝的真理永遠不變，現今的時代，教勢的處境需要上帝盡忠的工人奴僕，來做主的聖工，不過金錢、財利、權勢、名聲、地位，會使人的心內心靈沉淪、墮落、腐敗。懇求天父上帝願祢的聖靈與阮同在，使阮今仔日所討論所開的會議事、議案、行政、庶務、人事的銓衡以及人事的變動攏著遵守上帝的旨意來行，因為人的心計畫他的路，獨獨耶和華上帝定著他的腳步。懇求天父上帝幫助阮每一個人有清氣的心、誠實的心來面對一切的艱難與挑戰，照祢的良心來做正確的選擇，無陷落佇巴蘭的錯誤以及行該隱的路，大家同心與主同行，實踐上帝國的使命來榮光主的名，如此懇求祈禱感謝攏是靠主耶穌基督的聖尊名來求，阿們。（作者為總會平安基金會董事）
註：第69屆總會通常議會4月16日下午3點30分全體議事（一）總會議長彭志鴻牧師邀請總會平安基金會董事，壽山中會漢民教會長老蘭慈慧為這一堂全體議事祈禱。
