Chhiáⁿ an-chong NunitoPOJ jī-hêng, phòe-ha̍p Firefox Browser lâi tha̍k.
請安裝NunitoPOJ字型，配合Firefox瀏覽器來讀
◎Alana Hana
Tēⁿ tiúⁿ-ló pi-kio̍k-sèng ê sū-kiāⁿ í-āu, bo̍k-su tī tâi-á-téng tōa-siaⁿ hoah-hiu: “Tōaⁿ-chhèng, chhiúⁿ-kiap ê lâng ū chōe–lah! Chek-hoa̍t sī Siōng-tè ê chí-ì. Chi̍t gán pôe chi̍t gán! Chi̍t chhiú pôe chi̍t chhiú!” …M̄-ku, tī chai-iáⁿ tōaⁿ-chhèng, chhiúⁿ-kiap ê lâng sī ka-kī ê hāu-seⁿ ê sî, bo̍k-su to̍h ōaⁿ kóng： “Khoan-iông, goân-liōng ê lâng ū hok–lah! …Lâng nā kā lí siàn chiàⁿ-pêng ê chhùi-phóe, lí tio̍h oat tò-pêng ê chhùi-phóe koh hō͘ i siàn…”
—Tân-lûi Té-phiⁿ Siáu-soat-chi̍p 4: Âng-bó͘-tan
Tân-lûi sian-siⁿ chit-phiⁿ siu-lio̍k tī Âng-bó͘-tan ê“Ián-káng-ka”, tùi chong-kàu-ka ê phoe-phòaⁿ chin tōa-táⁿ ti̍t-chiap koh lō͘-kut, chiâⁿ kek-sim. Chit phiⁿ siáu-soat kán-tan kóng to̍h-sī teh khau-sé chong-kàu-ka kóng chi̍t-thò chò chi̍t-thò, chò–ê hâm kóng–ê bô-kâng, m̄-nā án-ne, koh khah khok-hêng–ê sī bo̍k-su am-khàm ka-kī ê hāu-seⁿ chia̍h-to̍k, thau-the̍h mi̍h, sat-jîn téng-téng ê chōe, siàn-tōng koh khòng-chè hōe-iú ê su-khó lêng-le̍k.
Góa chò Ki-tok-tô͘, te̍k-pia̍t ài khòaⁿ chit khoán ê bûn-chiuⁿ, in-ūi bô phoe-phòaⁿ to̍h bē chìn-pō͘, bô chìn-pō͘ to̍h gâu oaiⁿ-chhoa̍h–khì, gâu cháu-cheng–khì, kín hiú-nōa–khì, bô-chhái 16 sè-kí Má-teng Lō͘-tek bat chong-kàu kái-kek.
Góa khòaⁿ tio̍h chi̍t hāng sū: Kàu-hōe nā sī tan-sûn thoân-kàu, lán tiúⁿ-ló kàu-hōe ê khăn-páng kám bô kàu-gia̍h ēng? Kám bô hoat-tō͘ bō͘-khoán? Kám bô lêng-le̍k pān oa̍h-tāng? Ná-ē su-iàu sêng-li̍p “× × hia̍p-hōe” lâi pān oa̍h-tāng? Siu oa̍h-tāng pó-chèng-kim? Chia ê pó-chèng-kim soah chiâⁿ-chòe “Chū-tōng hōng-hiàn-kim”. Ū kòe-kè-su kóng: “Hia̍p-hōe kap kàu-hōe ê châi-bū sī to̍k-li̍p–ê, sió-hōe koàn bē tio̍h, kàu lō͘-bóe, hia̍p-hōe ê chîⁿ-gia̍h sī lâu tùi tó ūi khì? Kám kóng lán tiúⁿ-ló kàu-hōe bô lâng tì-ì chit-khoán tāi? Á-sī í-keng hiú-nōa ah?”
Má-thài Hok-im 23:25-28: “Ké-hó ê keng-ha̍k-kàu-su kap Hoat-lī-sài-lâng, lín chhám–ah! In-ūi lín chiong poe kap pôaⁿ ê gōa-bīn sóe chheng-khì, lāi-bīn khiok tóe-móa tham-io̍k kap hòng-chhiòng…lín chhin-chhiūⁿ chhat pe̍h-pe̍h ê bōng, gōa-bīn hó-khòaⁿ, lāi-bīn khiok tóe-móa sí-lâng ê kut-thâu kap ta̍k-hāng ê ù-òe. Lín mā chhin-chhiūⁿ án-ni, gōa-bīn hō͘ lâng khòaⁿ-chòe gī-lâng, lāi-bīn khiok chhiong-móa ké-hó kap put-hoat.”
Má-teng Lō͘-tek chú-tiuⁿ: “Ta̍k-lâng lóng tio̍h ū Sèng-keng, ū to̍k-li̍p su-khó ê lêng-le̍k, m̄-sī sîn-hū á-sī bo̍k-su kóng ê lóng-sī tio̍h–ê.” M̄-koh, sìn-tô͘ pah-pah khoán, bô su-khó lêng-le̍k–ê mā chin chē. Só͘-pái chong-kàu léng-siù ài ū kàu-io̍k lêng-le̍k, sī ín-chhōa lâng kiâⁿ tī gī-lō͘ ê tiōng-iàu jîn-bu̍t. Kì-jiân sī chong-kàu léng-siù, tō-tek-kám tio̍h pí hui sìn-tô͘ kap sìn-tô͘ koh-khah koân, giân-hêng-kú-chí mā tio̍h chin kín-sīn! Nā bô, sió-khóa bô-tiuⁿ-tî to̍h ē siū bê-he̍k, chia̍h-kàu chia̍h kah kàu-kàu-kàu.
Lô-má-su 3:10 kóng: “Lóng bô gī-lâng, liân chi̍t-ê to bô.” Só͘-í bo̍k-su mā sī chōe-jîn, tī sè-kan ū hoat-lu̍t sím-phòaⁿ, tī thian-kok ê sím-phòaⁿ koh khah tāng. Tùi ū koân ū éng-hióng la̍t ê lâng, beh kàm-tok in ê tō-tek-kám, ài pí it-poaⁿ ê lâng koh khah giâm-keh, in-ūi in ê giân-hêng-kú-chí lóng ē éng-hióng siā-hōe ê kè-ta̍t-koan.
